O‘zbekiston Prezidenti Administratsiyasi huzuridagi Iqtisodiy tadqiqotlar va islohotlar markazi pandemiya paytida eng muammoli masalalarni aniqlash uchun 2020-yilning may—iyun oylarida 3670 nafar respondent o‘rtasida so‘rov o‘tkazdi. Bu haqda Spot xabar berdi.
Ma’lum qilingan natijalarga ko‘ra, pandemiya paytida, birinchi navbatda, respondentlar daromadlarning kamayishi va yo‘qolishi muammosiga duch kelgan. Bu muammolardan mos ravishda 74 foiz va 58 foiz so‘rov ishtirokchisi shikoyat qilgan. Bundan tashqari, bu muammoga uchraganlarning aksariyati Toshkent shahrida (80 foiz) yashaydi. Jizzax, Sirdaryo va Qashqadaryo viloyatlari ham bu masalada muammoli bo‘lib chiqdi. Xorazm va Navoiy viloyatlaridagi vaziyat eng qulay bo‘lgan.
Shuningdek, so‘rov ishtirokchilari quyidagilar muammolarga ham duch kelgan:
- maishiy xizmatlarni olish (36 foiz);
- maktabgacha ta’limni olish (32 foiz);
- maktab ta’limini olish (31 foiz);
- oziq-ovqat narxlarining o‘sishi (23 foiz);
- kommunal to‘lovlar bo‘yicha qarzlar (15 foiz);
- stress va xavotir (9 foiz);
- nooziq-ovqat mahsulotlari narxlarining o‘sishi (7 foiz);
- eng yaqin do‘konda oziq-ovqat yetishmasligi (6 foiz).
Respondentlarning deyarli 44 foizi mehnat muhojirlarining qaytib kelishini payqagan, ularning 64,2 foizi uy-ro‘zg‘or buyumlari narxlarining o‘sishini kuzatmagan va 33,2 foizi may oyida oziq-ovqat mahsulotlari narxining biroz ko‘tarilishiga duch kelgan.
Respondentlarning to‘rtdan biridan ko‘prog'i (25,4 foiz) o‘zlarining farovonligi yomonlashayotganidan shikoyat qilgan.
Biroq qayd etilgan barcha muammolarga qaramay, so‘rov qatnashchilarining to‘rtdan uchdan ko‘prog‘i (75,8 foiz) vaziyat tez orada yaxshilanishiga ishonch bildirgan.
“Ushbu tadqiqot asosida biz aholi zichligi yuqori bo‘lgan hududlarga (Toshkent shahri, Toshkent va Samarqand viloyatlari) pandemiya oqibatlari ko‘proq salbiy ta’sir ko‘rsatishi mumkin, deb o‘ylaymiz”, — deya ta'kidlagan mutaxassislar.
Izoh (0)