Шавкат Мирзиёев 12 ноябрь куни «Афғонистон Ислом Республикаси билан иқтисодий ҳамкорликни янада кучайтириш ва мустаҳкамлаш чора-тадбирлари тўғрисида»ги қарорни имзолади, деб хабар бермоқда «Gazeta.uz».
Фото: «Дарё»
Ҳужжатга кўра, Uzbekistan Airways ва Uzbekistan Airports’га ноябрь ойида Афғонистоннинг KamAir ва Ariana Afghan Airlines компаниялари билан музокаралар ўтказиш вазифаси топширилган. Унинг натижасига кўра, 2021 йил январидан Тошкент, Қобул ва Мозори-Шариф шаҳарлари ўртасида доимий тўғридан-тўғри парвозларни тиклаш режалаштирилмоқда.
Бундан ташқари, 500 кВт қувватли «Сурхон—Пули-Хумри» электр узатиш линияси (ЭУЛ)ни қуриш лойиҳасини амалга оширишни тезлаштириш кўзда тутилган. Қурилиш бўйича тегишли келишув Осиё тараққиёт банки томонидан молиялаштирилиши тасдиқланганидан кейин имзоланади. ЭУЛнинг Ўзбекистон ҳудудидаги қисми 2021 йил мартигача қуриб битказилади. Афғонистон ҳудудидаги қурилиш ишлари 2021 йил августида бошланади.
Ҳужжат билан, шунингдек, Ўзбекистон Афғонистон билан йиллик савдо ҳажмини 2023 йилгача 2 миллиард долларга етказиш ҳам мақсад қилган. 2019 йилда бу миқдор 618 миллион долларни ташкил этган. Шундан 615 миллион доллар Ўзбекистон экспортига тўғри келади.
