Ваколатли органлар Ўзбекистонда ҳали ҳам учраб турган «қиз ўғирлаш» каби «эскилик сарқити бўлган одатлар» бўйича таҳлил ва тарғибот ишларини олиб бориши керак. Бу ҳақда Ўзбекистон Сенати раиси Танзила Норбоева 12 ноябрь куни бўлиб ўтган матбуот анжуманида фикр билдирди, дея хабар бермоқда «Дарё» мухбири Мусулмонбек Иброҳимов.
Маълум бўлишича, Ўзбекистонда 2018 йилда 9 та, 2019 йилда 11 та, 2020 йилнинг ноябрь ойига 3 та «қиз ўғирлаш» ҳолати қайд этилган, булар бўйича Жиноят кодексининг 136-моддаси (аёлни эрга тегишга мажбур қилиш) билан жиноят ишлари қўзғатилган.
«Баъзиларда бу урф-одат-ку, шундай қилсам ҳеч нарса бўлмайди, деган дунёқараш бор... Биз бундай ҳолатларга йўл қўймаслигимиз лозим. Никоҳ эр ва хотиннинг розилиги асосида бўладиган иш. Йигит ва қизлар фақат ўзаро розилик асосида турмуш қуриши керак. Ҳеч ким, ҳатто ота-онаси ҳам қизни эрга тегишга мажбурлашга ҳақи йўқ», — деди Танзила Норбоева.
Сенат раисининг фикрича, Ички ишлар вазирлиги, Маҳалла ва оилани қўллаб-қувватлаш вазирлиги, Ёшлар ишлари агентлиги каби ваколатли органлар бундай ҳолатлар бўйича таҳлил ва тарғибот ишларини олиб бориши мақсадга мувофиқдир.
«Аммо айрим ҳудудларда бу каби тарғиботларга ҳожат йўқ. Чунки, масалан, водий вилоятларида бундай одат йўқ. Шунинг учун айнан қайси ҳудудда қандай муаммо бўлса, ўша ҳудудда тарғибот-ташвиқот ишларини манзилли олиб бориш керак. Акс ҳолда кераксиз урф-одатларни бундай урф-одатлар йўқ жойларга тарғиб қилиб қўйишимиз ҳам мумкин», — дея қўшимча қилди Сенат раиси.
Қайд этишларича, «қиз ўғирлаш» ҳолатлари ўтган йиллар давомида, асосан, Қорақалпоғистон ва Қашқадарёда кузатилган.
Изоҳ (0)