Ўзбекистон Президенти 12 ноябрь куни Қашқадарё вилоятига қилган сафари мобайнида Қарши шаҳридаги Корхоналарни соғломлаштириш ва хусусийлаштириш клиникасига ҳам ташриф буюриб, унинг фаолияти билан танишди. Клиникада вилоятдаги йирик корхоналар ва тадбиркорлар томонидан ишлаб чиқарилаётган маҳсулотларнинг доимий кўргазмаси ташкил этилган. Мажлислар зали, музокара хоналари, экспортчилар уюшмаси ва ўқув марказлари ҳам жойлаштирилган. «Дарё» мухбири Миролим Исажонов Давлат активларини бошқариш агентлиги директори Суннатилла Бекенов билан суҳбатлашиб, клиникани йўлга қўйишдан мақсад, унинг вазифалари ва аҳамиятига оид саволларга жавоб олди.
«Хусусийлаштиришдан мақсад - тадбиркорларга йўл очиш»«Президентимиз жорий йилнинг 27 октябрь куни «Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида»ги фармонга имзо қўйди. Шундан сўнг 28 октябрь куни ўтказилган видеоселектор йиғилишида давлатимиз раҳбари бу борада аҳолига батафсил маълумот берадиган маслаҳат клиникалари ҳамда Call-марказ ташкил этиш зарурлигини таъкидлаган эди. Ушбу ҳужжат одамларда турли фикрларни уйғотяпти: безовталиклар ҳам, хурсандчиликлар ҳам бор. Хусусийлаштиришдан асосий мақсад - фаолият юритаётган давлат корхоналарини янада самарали ишлашини таъминлаш ҳамда тадбиркорларга йўл очиб беришдир. Ўзингиз яхши биласиз, агар давлатнинг бозордаги улуши қанча кўп бўлса, у шунча корхоналарга яқин кўмаклашувчи ва тадбиркорларга тўсиқ ҳам бўлади. Мисол учун, юқорида турувчи идора ва вазирликлар бирор хизматга эҳтиёж сезса, хусусий секторга эмас, балки, давлат унитар корхонасига мурожаат қилади. Натижада рақобат муҳити ва сифат йўқолади. Сифат йўқ бўлса, табиийки, таннарх ҳам ўсади. Шундай экан, давлат активларини хусусийлаштириш иқтисодиёт учун фақат манфаат келтиради».
«Шаффофлик таъминланади»«Давлат мулки талон-торож бўлмайдими?», «Хусусийлаштириш жараёни шаффоф ўтадими, таниш-билишчиликка йўл қўйилмайдими?», каби саволлар ҳам одамларда шубҳа, хавотир уйғотаётгани бор гап. Давлат мулки бу – халқ мулки. Шундай экан, бинолар хусусийлаштирилиб, сотилаётганида ҳам, инвесторларга берилаётганида ҳам, албатта, шаффофлик таъминланади. Бу каби саволларга жавоб топиш ва жараённинг очиқ-ойдин ўтказиш мақсадида юртимизнинг барча вилоят марказларида корхоналарни соғломлаштириш ва хусусийлаштириш клиникалари ташкил этиляпти. Шуни алоҳида таъкидлаш жоизки, хусусийлаштиришдан мақсад бюджетга пул тушириш эмас, давлат пул учун корхоналарни сотиб юбормаяпти. Балки, корхонани янада соғломлаштириб, рақобатбардош маҳсулот ишлаб чиқаришга айлантиришдир».
«Муаммоларни ҳал қилишга яқиндан кўмаклашади»«Маҳсулот ишлаб чиқаришдаги қатор қийинчиликлар, инвестор тополмаслик, банкдан кредит ололмаслик сингари турли муаммолар охир-оқибат тадбиркорнинг аҳволини қийинлаштиради, яъни носоғлом муҳитга олиб келади. Юртимизда муаммога дуч келган ишбилармонлар ўз дардини бориб айтадиган савдо-саноат палатаси, бизнес омбудсман, бош вазир қабулхоналари, «Тадбиркор аёл» Ўзбекистон ишбилармон аёллар ассоциацияси каби кўплаб ташкилотлар фаолият юритади. Лекин улар тадбиркорни қийнаётган масалани тегишли мутасадди вазирликларга етказади. Натижада ҳар доим ҳам ишбилармоннинг муаммоси тезкор ечим топмайди, тадбиркор мурожаати ортидан сарсон юраверади. Бу каби клиникалар эса муаммоларни ҳал қилишга яқиндан кўмаклашади. Аввало, ҳар қандай муаммонинг сабаби ва оқибатлари чуқур таҳлил қилиниб, оқибат билан эмас, сабабга қарши курашилади. Клиникага барча соҳа вакиллари чақиртирилиб, муаммога биргаликда ечим топилади».
«Клиникалар фаолияти барча вилоятда йўлга қўйилди»«Корхоналарни соғломлаштириш ва хусусийлаштириш клиникалари Қорақалпоғистон, Тошкент шаҳри ва барча вилоятларда очилган. Шунингдек, куну тун ишлайдиган 1082 рақамли Call-марказ ҳам йўлга қўйилди. Мазкур клиникалар Давлат активларини бошқариш агентлиги ва унинг ҳудудий органлари томонидан бошқарилади. Уларнинг фаолиятида Савдо-саноат палатаси, бош вазир қабулхонаси, Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлигининг ҳудудий бошқармалари ва ҳокимлик вакиллари доимий иштирок этади. Бундан ташқари, сўровга асосан бошқа вазирлик ва идоралар, тижорат банклари ходимлари ҳам жалб этилиши мумкин».
«Ҳамма хизматлар бепул»«Қашқадарё вилоятида фаолиятини тўхтатган ёки ёпилиш арафасида турган, солиқдан муддати ўтган қарзи бор, маҳсулоти сотилмай, йиғилиб қолаётган мингтага яқин корхоналар мавжуд. Уларнинг барчаси соғломлаштиришга муҳтож. Яқинда фаолиятини бошлаган клиникада мазкур корхоналар чуқур таҳлил қилиниб, уларни яна аввалгидек ишлашига кўмаклашилади.
Қарши шаҳридаги мазкур клиникада иқтисодий-молиявий ва юридик маслаҳатлар бериш, информацион хизматлар кўрсатиш учун барча шароит яратилган. Малакали мутахассислар бириктирилиб, инфокиосклар ўрнатилган. Бу ерда хусусийлаштиришга қўйилган объектлар, уларнинг манзили, ҳолати, соҳадаги тартиб-қоидалар ҳақида батафсил маълумот олиш мумкин. Ҳамма хизматлар бепул. Тадбиркорларга давлат активларини сотиб олиш, корхоналарни хусусийлаштиришга оид саволларга жавоб олиш ва муаммоларни ҳал қилишда амалий кўмак кўрсатилади. Президентимиз бу тизимни янада такомиллаштириш, янги хизмат турларини йўлга қўйиш, бир сўз билан айтганда, аҳолига ва тадбиркорларга қулайлик яратиш борасида топшириқлар берди. Биз шундай муҳит яратишимиз керакки, токи ҳар бир фуқаро бу клиникага келиб, муаммосини шу ернинг ўзида ҳал қилсин. Ортиқча вақт ва маблағ сарфламасин».
Изоҳ (0)