Мухтор Ҳайитмуродов Нишон тумани «қизил» ҳудуддан қачон ва қандай йўл билан чиқишини маълум қилди

Нишон тумани маҳаллий бюджетида 2015 йилда умуман маблағ қолмас эди. Ҳокимларга қўшимча маблағлар тушириш ва ишлатиш имконияти берилгач, ушбу ҳудуд иқтисодиёти ҳам ривожлана бошлади. 2020- йилнинг январь—сентябрь ойида туман бюджетига 6 миллиард сўм қўшимча маблағ тушди. Тўртинчи чоракда яна 4 миллиард сўм тушиши кутилмоқда. Бу ҳақда туман ҳокими Мухтор Ҳайитмуродов «Дарё» мухбири Миролим Исажоновга берган интервьюсида таъкидлаб ўтди.

«Жорий йил якунига қадар туман бюджетига жами 10 миллиард сўм қўшимча маблағ тушиши режалаштирилган. Мазкур пуллар туман ҳокими ва халқ депутатлари туман Кенгашининг қарорларига асосан ҳудуднинг зарур эҳтиёжларига йўналтирилади. Буни давлатимиз раҳбари томонидан ҳокимларга берилган имконият, изчил ислоҳотлар олиб бориш учун яратилган шароит, деб биламан.

Туманимиз 2019 йил якунлари бўйича «қизил» ҳудудга тушган эди. Ҳудуд иқтисодиётида йирик корхона ҳисобланган Толимаржон иссиқлик станцияси кўрсаткичлари туман кўрсаткичининг 60-65 фоизини ташкил этади. Бу рейтинг жорий қилинмасдан олдин ушбу катта корхона ҳисобидан кўрсаткичларни ёпиб юрганмиз. Корхона ҳисоб-китоби Нишон туманидан чиқарилганидан сўнг бизнинг ҳақиқий аҳволимиз маълум бўлди», — деди Ҳайитмуродов.

Унинг маълум қилишича, 2020 йил якунигача Нишон тумани «қизил» ҳудуддан чиқиши кутилмоқда.

«Туманни «қизил» ҳудуддан чиқариб, «сариқ» ва «яшил» ҳудудга ўтказишга мўлжалланган «йўл харитаси»ни ишлаб чиқиш жараёнида барча имкониятларимизни чуқур таҳлил қилдик. Биринчи навбатда, чорвачиликни ривожлантиришга жиддий киришмоқчимиз. Президентимиз Касби, Миришкор, Косон туманлари қатори Нишонни ҳам чорвачиликка ихтисослаштириб, йирик комплекслар ва кичик бўрдоқичилик фермалари ташкил этиш, озуқа базаси учун ер ажратиш вазифасини қўйди. Бу соҳани йўлга қўйиш учун минг гектар ер ажратдик. Кейинги йилда 4 минг бош наслли қора мол ва 8 минг бош майда шохли мол олиб келиш эвазига сутни қайта ишлашни 5 минг тонна, гўштни қайта ишлашни эса 1 минг тоннага оширмоқчимиз.

Шунингдек, мева-сабзавотчиликни ҳам ривожлантириш режамизда бор. 1300 гектар ерни тадбиркорларга ажратиб бердик. Улар томонидан 30 минг тонна атрофида қўшимча маҳсулот етиштирилади. 5 минг тоннадан зиёд мева-сабзавотларни қайта ишлайдиган ва саралайдиган 5 та лойиҳани амалга оширамиз. Чорвачилик ва мева-сабзавотчиликни ривожлантириш орқали 2 минг 700 га яқин янги ишчи ўрни яратилади ва туманда 35 миллиард сўм қўшимча саноат маҳсулотлари ишлаб чиқарилади. Натижада аҳоли жон бошига ишлаб чиқарилган маҳсулот ҳажми ҳам кескин ошади.

Нишон туманини «қизил» ҳудуддан чиқариш мақсадида ишлаб чиқилган «йўл харитаси» бўйича 2020 йилнинг якуни билан «сариқ» ҳудудга, 2021 йил охирида эса «яшил» ҳудудга ўтишни режалаштирганмиз. Айни пайтда бу борада жиддий ишлар олиб боряпмиз», деди Нишон тумани ҳокими.

Эслатиб ўтамиз, аввалроқ 2019 йил якунлари бўйича ҳудудларни ижтимоий-иқтисодий ривожлантириш даражасини баҳолаш рейтингида Нишон тумани 13 та кўрсаткич бўйича бошқа ҳудудлардан паст натижа кўрсатиб, «қизил» ҳудудга тушиб қолгани, баҳолашнинг асосий 21 та устувор йўналишидан 8 таси бўйича паст кўрсаткич қайд этилгани ҳақида хабар берилган эди.