Ўзбекистонда олий таълим муассасаларида ўқув жараёнини босқичма-босқич 16 ноябрдан анъанавий таълим шаклида давом эттиришга қарор қилингани тўғрисида хабар берилганди. Олий ва ўрта махсус таълим вазирлигининг маълум қилишича, ҳар бир олий таълим муассасасида ҳудудий Соғлиқни сақлаш бирлашмалари, Санитария-эпидемиологик осойишталик ва жамоат саломатлиги хизмати вакиллари жалб қилинган ҳолда тезкор штаб ташкил этилади.
Таъкидланишича, аудитория ва хоналар ўқув жараёнига Санитария-эпидемиологик осойишталик ва жамоат саломатлиги хизмати ҳудудий бўлинмалари билан биргаликда тайёрланади. Шунингдек, курслар кесимида ўқув жараёнини ташкил этиш схемаси ишлаб чиқилиб, табақалаштирилган вақт соатлари асосида дарс жадваллари тузилади.
Талабалар турар жойлари фаолияти санитария-гигиена ва дезинфекция талабларига қатъий жавоб берадиган нормаларда ташкил этилиб, жиҳозланган ҳолатда талабаларнинг яшашларига босқичма-босқич рухсат берилади.
Олий таълим муассасалари ва талабалар турар жойларида тиббиёт пунктлари ташкил этилади, талабалар саломатлиги назоратини таъминлаш мақсадида ҳар бир олий таълим муассасасига тиббиёт муассасалари бириктирилади.
«Бугунги пандемия шароитида яшашга, меҳнат қилишга ва ўқишга кўникишимиз, энг асосийси – фарзандларимиз сифатли таълим олишни давом эттиришлари учун барча имкониятларни яратишимиз лозим», — дейилади хабарда.
Эслатиб ўтамиз, Ўзбекистон олий таълим муассасаларида 2020/2021-ўқув йили 2 сентябрдан масофавий шаклда бошланганди. Сентябрь ойининг бошида Олий ва ўрта-махсус таълим вазирлиги матбуот котиби Фарҳод Бабашев Ўзбекистон ОТМларида анъанавий таълим шакли 2021 йилнинг январь—февраль ойларида иккинчи семестр бошланиш вақтида қайта тикланиши мумкинлигини айтганди.
Изоҳ (0)