Бухородан Тошкентга келаётган поезд носозлик сабаб 1,5 соатдан ортиқроқ тўхтаб қолди

14 ноябрь куни Бухоро—Тошкент йўналишида ҳаракатланаётган «Афросиёб» поезди носозликка учради. Бу ҳақда «Ўзбекистон темир йўллари» матбуот хизмати хабар берди.

Қайд этилишича, Бухоро – Тошкент йўналишида ҳаракатланаётган 765-сонли «Афросиёб» электропоезди техник носозлик сабаб соат 08:11 да «Бахт» станциясида тўхтаган. Носозликни бартараф қилиш чоралари кўрилгандан сўнг, шу куни соат 09:50 да ўз йўналиши бўйлаб ҳаракатни давом эттирган.

«Ўзбекистон темир йўллар» АЖ раҳбарияти юзага келган ноқулайлик учун йўловчилардан узр сўраган.

Аввалроқ «Ўзбекистон темир йўллари» АЖ томонидан йўловчиларнинг замонавий поездларга бўлган талабини тўла қондириш мақсадида Тошкент–Самарқанд–Тошкент йўналишида ҳаракатини амалга ошираётган «Афросиёб» электропоездининг рейси яна биттага кўпайтирилаётгани тўғрисида хабар берилганди.

Эслатиб ўтамиз, 2019 йилнинг 14 ноябрида ҳам Бухородан Тошкентга келаётган поезд электр таъминотидаги узилиш сабаб Жомбойда тўхтаб қолганди.