Фарғонада ўзганинг телефонини ўғирлаб қочган номаълум шахс қўлга олинди, деб хабар беради Тергов департаменти.

Фото: Тергов департаменти

Маълумотларга кўра, 10 ноябрь куни соат 04:08 да 31 ёшли Н.С. исмли фуқаро «Шифокор» маҳалласи ҳудудидаги дорихона томон ҳаракатланиб кетаётган вақтида ёнидан номаълум шахс велосипед бошқариб, чамаси 30 метр масофа ўтганидан сўнг тўхтаган. Эркак велосипедини ташлаб, унинг қаршисига келган ва зўрлик ишлатиб, қўлида бўлган нархи 200 минг сўмлик Lenovo русумли уяли телефон аппаратини очиқдан очиқ талон-торож қилиб, велосипеди билан ҳодиса жойидан яширинган.

Мазкур ҳолат юзасидан номаълум шахсга нисбатан 11 ноябрь куни Фарғона тумани ИИБ ҳузуридаги Тергов бўлими томонидан Жиноят кодексининг 166-моддаси 2-қисми «а» банди (ҳаёт ва соғлиқ учун хавфли бўлмаган зўрлик ишлатиб ёхуд шундай зўрлик ишлатиш билан қўрқитиб содир қилинган талончилик) билан жиноят иши қўзғатилган.

Фото: Тергов департаменти

Тезкор тергов ҳаракатлари олиб борилиши натижасида жиноятни муқаддам бир неча маротаба босқинчилик ва ўғирлик жиноятлари содир этган шахс «Кончилар» маҳалласида истиқомат қилувчи 31 ёшли Ш.М. эканлиги аниқланган. Терговга қадар текширув вақтида Ш.М. турмуш ўртоғига юқоридаги талончилик йўли билан эгаллаб олинган уяли телефон аппаратини ишхонасига яшириб қўйганлигини ва уни зудлик билан йўқотиш кераклигини айтган.

Бироқ аёл бу ҳақда ички ишлар идораси ходимларига маълум қилган. Натижада ашёвий далил тариқасида расмийлаштириб олинган уяли телефон аппарати Ш.М.нинг хизмат хонасида бўлган супургилар орасидан топилган.

Фото: Тергов департаменти

Фото: Тергов департаменти

Тергов ҳаракатлари жараёнида Ш.М.га нисбатан Жиноят кодексининг 166-моддаси 2-қисми «а» банди билан айблов эълон қилиниб, қамоққа олиш тарзидаги эҳтиёт чораси қўлланилган.

Аввалроқ Фарғонада 18 ёшли йигитнинг 2 қоп бодоми ва Samsung Galaxy А20 телефонини тортиб олган шахслар, шунингдек, Тошкентда босқинчилик йўли билан фуқаронинг уйидан 127 000 доллар ўғирлаган шахслар ушлангани тўғрисида хабар берилганди.