Президент Шавкат Мирзиёев Қашқадарё вилояти фаоллари, маҳаллий кенгаш депутатлари, вазирлик ва идоралар раҳбарлари иштирокидаги йиғилишда вилоятнинг мева-сабзавот экспортидан даромади пастлиги ҳақида гапириб, вилоятда қишлоқ хўжалиги абгор аҳволда эканлигини билдирди.
Давлат раҳбарининг маълумот беришича, вилоятда ерларни нотўғри суғориш оқибатида мавжуд экин майдонларининг 45 фоизи шўрланган. Айниқса, бу борада Муборак, Ғузор, Нишон ва Косонда аҳвол жуда оғир. 38 минг гектар майдон фойдаланишдан чиқиб кетган. Томчилатиб суғориш жами суғориладиган майдоннинг бор-йўғи 2,4 фоизида жорий қилинган.
Шавкат Мирзиёев вилоятда ерлардан фойдаланиш унумдорлиги пастлиги ҳақида гапириб, бош вазирнинг аграр ва озиқ-овқат соҳаларини ривожлантириш масалалари бўйича ўринбосари Шуҳрат Ғаниевдан Фарғонага раҳбарлик қилган пайтида вилоят мева-сабзавот экспортидан қанча даромад олганини сўради.
Шуҳрат Ғаниевдан 450 миллион доллар, деган жавобни эшитган президент Зоир Мирзаевдан Қашқадарё қанча мева-сабзавот экспорт қилаётганини сўради.
«Қашқадарё 90 миллион доллар экан. Ваҳоланки, Қашқадарё вилоятидаги ерларга Фарғонадаги ерларга нисбатан икки баравар кўп сув берилади. Мана натижа», — деди Шавкат Мирзиёев.
Йиғилишда маълум қилинишича, ўтган йили вилоятда пахта ҳосилдорлиги гектарига 19 центнерни ташкил қилган.
«Ҳатто Қорақалпоғистонда бу кўрсаткич 17 центнерни кўрсатган. Қорақалпоғистон ва Қашқадарё ерларининг унумдорлигида фарқ борми? Вилоятда қишлоқ хўжалиги маҳсулотларини етиштиришда илмий асос ва инновацион ёндашув йўқ, вилоят иқлим шароитига мос янги навлар яратилмаган. Шунинг учун оғир бўлса-да, вилоятнинг қишлоқ хўжалиги соҳасидаги салоҳиятини ошириш учун 675 миллион доллар пул берамиз. Аммо эртага натижани кўрамиз», — деди давлат раҳбари.
Изоҳ (0)