Интернетда Андижон вилояти ҳокими Шуҳрат Абдураҳмонов унга «сассиқ гапирган» марҳаматлик уч аёлни 15 суткага қаматгани ҳақида гапирган аудио тарқалди. Аудиода ҳоким журналистлар ҳақидаги фикрларини ҳам билдирган. Бу ҳақда «Kun.uz» хабар қилмоқда.
Тарқалган аудио парчасида вилоят ҳокими дастлаб журналистлар ҳақида гапиради.
«Ўтган куни журналистлар билан пресс-конференция ўтказдим. 50 та ташкилотни чақиришибди, шулар билан савол-жавоб қиламиз деб. Ҳаммасини ҳайдаб юбордим.
Мен билан савол-жавоб қилиш деяпман, мен жавоб бераман. Булар ҳаммаси менинг топшириғимни бажарган. Нима саволинг бўлса, бер. Икки ярим соат гапиргандим. Савол беришолмади биттаси ҳам.
Энди дедим, қизиғи чиқмай қолади, дедим. Бир-иккита савол бериб қўйинглар, дедим. ‘Қичиқ’ савол бергиси келди-да. Сўзимни бошида айтиб қўйдим: Эшитишиб ол, Тошкентдан келган бўлсанг ҳам, қаердан келган бўлсанг ҳам, мен ишлайдиган ҳокимман, дедим. Ҳамма нарсамни, соғлиғимни ҳам тикиб қўйяпман, дедим. Менга қичиқ савол беришмагин, дедим. ‘Нормалний’ савол бер, ‘нормалний’ гаплашамиз, дедим. Агар қитиғимга тегсанг, мен қўйвораман, дедим.
Қаттиқроқ гапириб юбораман, эртага ҳаммаёқ сенсация бўлиб кетади. ‘Нормалний’, соғ одамга ўхшаб гаплаш мен билан, дедим.
Барибир уларники қўзиб туради-ю, айлантириб келганди бир-иккитаси тарсиллатиб уриб қўйганимдан кейин ҳеч нарса деёлмасдан уёққа бориб, бошқа фамилия билан бир нарсалар чиқариб ётибди.
Э, эркакмисан, ҳезалак, ўзингни номингдан ёз! Менга Ҳасанбой келиб қатнашяпти, уёққа бориб Ҳусанбойнинг номидан чиқаришяпти», – деган Шуҳрат Абдураҳмонов.
Андижон вилояти ҳокими аудио давомида Марҳамат туманидан бўлган уч аёлни 15 суткага қаматганини айтади.
«Чарчаб чиқсам 5-6 одам қабулда турган экан, қабул қилмайман, дедим. Кейин улар роса шаллақилик қилди ўша ерда. Мана ҳозир шунақа ‘милий’ бўлиб ўтиришибди, 15 суткага қаматиб қўйганимдан кейин...
Кечагинда Марҳаматда йиғилиш ўтказсам, йиғилиш қилаётган пайтимда ташқарида биттаси бақиряпти. Чиқсам, бешта шаллақи. Иккитаси ногирон, учтаси анақа. Ногиронга тегмадим, учовини олиб кириб тиқиб қўйдим 15 суткага. Ана, марҳаматликлар бўлса, айцин: шунақа жимжит бўлиб қолди Марҳамат ҳам.
Марҳаматга келганда юрагим безилларди. 5-6 та хотиннинг дастидан. Тиқиб қўйдим обориб. Ҳамма нарсани гапираверадими?
Оғзига зеб берувди. Шарт ҳужжат қилдирдим, олиб кириттириб қўйдим. Вилоят ҳокимига, президент вакилига сассиқ гапиргани учун. Давлат бор, Худога шукр», – деган Андижон вилояти ҳокими Шуҳрат Абдураҳмонов «тарбиявий соат»ида.
Ушбу аудио қачон ва қаерда ёзиб олингани маълум эмас. Аудиода ҳар замонда одамлар кулгиси эшитилиб турганидан ҳоким бу қандайдир йиғилишда, кўпчиликнинг ичида айтганини англаш мумкин.
Аудиода Шуҳрат Абдураҳмонов ўзига «сассиқ гапларни гапиргани» учун 15 суткага қаматтиргани айтилган аёллар шу йилнинг 26 октябрь куни Андижон вилояти ҳокимлиги биноси олдида аҳоли томонидан норозилик уюштиргани тахмин қилинади.
Ижтимоий тармоқларда тарқалган маълумотларда ушбу аёллар вилоят ҳокимлигига кўмир ва ижтимоий ёрдам ажратилишини сўраб, аксарият фуқаролар эса озиқ-овқат нархларининг ошиб кетишига ечим излаб келгани айтилади.
Тарқалган аудиоёзув юзасидан вилоят ҳокимлиги муносабат билдирди.
«Мазкур аудиоёзув Андижон вилояти ҳокими Ш.Абдураҳмоновга тегишли экани, аммо ушбу аудиоёзув бундан икки йил муқаддам ёзиб олингани маълум бўлган. Бундан ташқари, аудиоёзувда вилоят ҳокимининг билдирган фикрида барча ОАВ вакилларига эмас, аксинча айрим нохолис ОАВ ходимларига нисбатан айтилганлигини билиш мумкин», — дейилади хабарда.
Аввалроқ Андижон вилояти Бўстон тумани ҳокими Садбархон Мамитова тумандаги фермерлар билан учрашувда уларни «мараз», «ифлос» деб ҳақоратлаган, соя ўсимлиги билан боғлиқ режани бажармаган фермерларга ерини олиб қўйиш билан таҳдид қилган аудиоёзув тарқалган эди. Андижон вилояти ҳокимлиги ушбу ҳолат юзасидан туман ҳокимига огоҳлантириш бериш билан чекланган эди.
Изоҳ (0)