Москва мэри Сергей Собянин Москва аҳолисининг тахминан 2,5-3 миллион нафари коронавирусга чалиниб чиққанини айтди. «РБК»нинг ёзишича, бу ҳақда у «Первий канал»га берган интервьюсида маълум қилган.
«Ёзда ҳам касалланиб чиққанимиз ва кузда касалланганлар сони сезиларли даражада ортганини ҳисобга олсак, менимча бу рақам 2,5-3 миллион киши атрофида», — деган Собянин москваликларнинг қанчаси COVID-19’га чалингани ҳақидаги саволга жавобан.
11 ноябрда Собянин Москва бир неча ойдан сўнг COVID-19 билан касалланишнинг энг юқори чўққисини енгиб ўтишини айтганди, шу билан бирга 2021 йил бошланиши оғир бўлишини, эҳтимол жорий йилгидан ҳам оғирроқ бўлиши мумкинлигини билдирган.
Куни кеча мэр яқин ҳафталарда шаҳардаги эпидемиологик вазият ёмонлашишда давом этиши мумкинлигини маълум қилди.
Москвада коронавирус тарқалиши кучайгани сабабли янги чекловлар жорий қилинган. Хусусан, умумий овқатланиш шохобчалари (ресторан, кафе, барлар), шунингдек, тунги клублар, караоке, боулинг клублар соат 23:00 дан 06:00 гача ишламайди. Москвадаги ОТМ ва коллеж талабалари масофавий таълимга ўтди. Барча чекловлар икки ой давомида — 2020 йилнинг 13 ноябридан 2021 йилнинг 15 январигача амалда бўлади. Бундан ташқари, Москва ҳукумати Янги йил муносабати билан ўтказиладиган оммавий тадбирлардан воз кечадиСўнгги суткада Москвада 4477 кишида коронавирус қайд этилди. Эпидемия бошланганидан буён касалланганларнинг умумий сони 485,5 минг нафардан ошди. Пойтахтда суткалик касалланганлар сони 5 минг кишидан кам бўлган ҳолат охирги марта 2 ноябрь куни қайд этилган.
Изоҳ (0)