Россиянинг Кемерово вилоятида «Спутник V» вакцинаси билан эмланган шифокор коронавирусга чалинди. Шундай ҳолат Олтой ўлкасида ҳам кузатилганди

Россиянинг Кемерово вилоятидаги шифокорлардан бири COVID-19’га қарши биринчи эмлашдан сўнг коронавирусга чалинди. Meduza’нинг хабар беришича, бу ҳақда Кемерово соғлиқни сақлаш вазирининг ўринбосари Елена Зеленина маълум қилди.

«Касаллик эмлашдан кейинги 5—6-куни қайд этилган, шунинг учун инкубация даврини ҳисобга олган ҳолда, бу бевосита вакцинация билан боғлиқ деб айтиб бўлмайди. Иммунитет биринчи дозани сўнг ишлаб чиқарилади бошлайди, аммо иммунитетнинг тўлиқ шаклланиши иккинчи дозадан кейин давом этади», — дея унинг сўзларини келтирган «ТАСС».

Шунга ўхшаш ҳолат Олтой ўлкасида ҳам қайд этилганди. «Спутник V» вакцинаси билан COVID-19 коронавирус инфекциясига қарши эмланган уч нафар тиббий ходимнинг коронавирусга топширган тести ижобий натижа берган.

Россия Соғлиқни сақлаш вазирлиги вакцинани қабул қилган тиббиёт ходимлари коронавирусга нисбатан иммунитет ҳосил бўлишга улгурмасидан олдинроқ COVID-19’га чалинганини маълум қилган.

Вакцина олганидан кейин COVID-19’ни юқтириб олиш ҳолатлари аввал ҳам қайд этилганди. Хусусан, Россия Давлат думасида «Адолатли Россия» фракцияси раҳбари ўринбосари Валерий Гартунг билан шундай ҳолат юз берган.

«Спутник V» вакцинаси синовларида қатнашган Гартунг синовлар иштирокчилар учун яширин тарзда олиб борилаётганини айтганди. «Биз, тажриба иштирокчилари ё плацебо, ё вакцина олишимиз ҳақида огоҳлантириламиз, бунда имкониятлар 25 га 75 фоиз. Яъни 10 минг кишига плацебо, 30 минг кишига вакцина берилади. Мен 25 фоиз ичига тушдим. Чунки менда биринчи мартадан кейин ҳам, иккинчи мартадан кейин ҳам ҳеч қандай симптомлар бўлмади. Энди эса менда тест ижобий чиқди, демак, аслида менга плацебо тушган», — деган эди депутат касалланганидан кейин.

Гамалея номидаги Эпидемиология ва микробиология миллий тадқиқот маркази мутахассислари томонидан ишлаб чиқилган Россиянинг «Спутник V» вакцинаси дунёда биринчи бўлиб рўйхатдан ўтказилган COVID-19’га қарши вакцина ҳисобланади. Россия Соғлиқни сақлаш вазирлигининг терапия ва умумий тиббий амалиёт бўйича бош мутахассиси Оксана Драпкина ушбу препарат самарадорлиги 90 фоиздан юқори деб айтганди.