Ереванда Арманистон парламенти биноси ёнида норозилик намойишларини уюштираётганлар Миллий мажлис спикери Арарат Мирзоянни дўппослади, дея хабар бермоқда «РБК».
Фото: «РИА Новости»
Мирзояннинг соқчилари ва намойишчилар ўртасида тўқнашув юзага келган. Бу пайтда спикер автомобиль ичида бўлган. Намойишчилар машинани ўраб олиб, Мирзоянни ундан чиқариб олган ва дўппослаган.
Шундан сўнг жанжалга спикернинг соқчилари ва ҳарбийлар аралашган. Мирзоянни яна машинага жойлаштиришган, унинг аҳволи қандайлиги номаълум. «РБК»нинг Еревандаги мухбири Мирзояннинг дўппослангани ҳолатини тасдиқлади ва аҳволи ёмонлигини маълум қилди.
Арминфо нашри ёзишича, Мирзоян автомобилда болалари билан бирга бўлган. Воқеа жойига тез ёрдам машинаси етиб келган, аммо шифокорлар бир муддат жабрланувчининг ёнига бора олмаган. Кейинроқ «News.аm» парламент спикери касалхонада эканлигини маълум қилди. «РБК»нинг Арманистон ССВдаги манбасига кўра, Мирзояннинг ҳаётига ҳеч нарса хавф солмаяпти.
Мирзоян мамлакат бош вазири Никол Пашинян Тоғли Қорабоғда ўт очишни тўхтатиш ҳақидаги битимни имзолаганини эълон қилгач, Ереванда бошланган норозилик намойишлари чоғида ҳужумга учраган.
Сулҳ шартларидан, хусусан, Озарбайжонга баҳсли ҳудудларнинг бир қисми берилишидан норози бўлган намойишчилар республика ҳукумати биносига бостириб кирди. Улар Пашинян уларга топширилишини талаб қилди, ҳукуматга қарши шиорларни бақириб айтди. Арманистон пойтахти марказида жами бир неча минг киши тўпланди.
Эслатиб ўтамиз, Арманистон, Озарбайжон ва Россия етакчилари 9 ноябрь куни кечқурун Қорабоғда жангларни тўхтатиш ҳақида уч томонлама шартнома имзолади. Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.
Баҳсли ҳудудга 2 мингга яқин Россия тинчликпарварлари киритилади, улар ўт очишни тўхтатиш режимига риоя қилинишини назорат қилади. Шунингдек, томонлар асирлар, марҳумларнинг жасадларини айирбошлашни бошлайди ва минтақада транспорт қатновини қайта тиклайди.
