Эстония ички ишлар вазири Март Хельме АҚШда бўлиб ўтган президентлик сайлови ҳақида фикр билдирди ва бу фикрлар ортидан унга нисбатан ёпирилган танқидлар сабабли истеъфога чиқди. Бу ҳақда «РБК» хабар берди.
«Мен Эстония мудофаа қобилиятига путур етказадиган ҳеч нарса қилмадим. Мен Америка ОАВлари гапирмаётган нарсани гапирмадим. Эркин Америка ОАВлари», — дея таъкидлаган Хельме. Унинг қўшимча қилишича, ғалаба учун ўзига етарли овозларни таъминлаган Жо Байден ҳали АҚШ президенти ҳисобланмайди, унинг ваколатлари эса барча суд жараёнлари якунланганидан кейин тасдиқланади.
Аввалроқ Март Хельме ва Эстония молия вазири Мартин Хельме ТРЕ радиостанциясидаги чиқиши вақтида АҚШдаги сайловларнинг ҳалоллигига шубҳа қилишини билдирган. «Менимча, сайлов сохталаштирилганига ҳеч қандай шубҳа йўқ», — деган Мартин Хельме. Ўз навбатида, Март Хельменинг қўшимча қилишича, Байденнинг ғалабаси ортида «чуқурликдаги давлат» турибди. Эстония бош вазири Юри Ратас эса вазирларнинг сўзларини танқид қилган ҳамда АҚШдаги сайловни «сохта хабарларга» асосланиб, танқид қилиш вазирлар учун ўринли эмаслигини таъкидлаган.
Жо Байден жамоавий сайловчиларнинг 270 дан ортиқ овозини тўплагани ҳақида 7 ноябрь куни маълум бўлди. Бу ҳақда АҚШнинг етакчи ОАВлари, жумладан CNN, The New York Times ва Associated Press хабар берди. Бироқ АҚШнинг амалдаги президенти Дональд Трамп сайлов якунланишига «ҳали кўп вақт борлигини» маълум қилган. Унинг сўзларига кўра, бўлиб ўтган сайловда почта орқали овоз бериш билан боғлиқ кўп сонли қонун бузилишлари юз берган. Дональд Трамп 9 ноябрдан бу масала бўйича суд жараёнини бошлашни ваъда қилган.
Экспертларнинг фикрича, суд жараёнлари алоҳида штатлардаги овозларни қайта ҳисоблаб чиқиш сайловнинг расмий натижаларини эълон қилишни узоқ муддатга қолдириши мумкин. Бироқ 20 январгача сайлов комиссияси овоз бериш якунларини эълон қилмаса, Трамп ўз ваколатларини президент вазифасини бажарувчига топшириши керак бўлади. Бу вице-президент ёки АҚШ вакиллар палатаси спикери бўлиши мумкин.
Изоҳ (0)