Озарбайжон Тоғли Қорабоғда арманлар учун «ўзини ўзи бошқаришнинг маълум даражасини» — хусусан, шаҳар бошқаруви ёки маданий автономияни тақдим этишга тайёр. Бу ҳақда Озарбайжон президенти Илҳом Алиев BBC News’га берган интервьюсида маълум қилди, деб ёзмоқда «Коммерсантъ».
Илҳом Алиевнинг фикрича, Тоғли Қорабоғ Озарбайжоннинг ажралмас қисми бўлган ва шундай бўлиб қолади.
«Биз у ерда бошқарувнинг қандай шакли бўлишини аниқлаш учун музокара жараёнида катта силжишга эришмадик. Бизнинг позициямиз шундан иборатки, ўзини ўзи бошқаришнинг маълум даражаси бўлиши керак, масалан, арманлар учун шаҳар бошқаруви ёки маданий автономия. Бироқ биз жуда узоққа бормадик. Тоғли Қорабоғ — Озарбайжоннинг ажралмас қисми. У бошқа ҳар қандай ҳудуд каби Озарбайжоннинг бир қисми бўлиб қолади», — дея маълум қилган Илҳом Алиев.
Озарбайжон президентининг қўшимча қилишича, у айни пайтда Тоғли Қорабоғнинг эҳтимолий автономияси ҳақида гапирмасликни маъқул кўради. «Энди вазият ўзгарди. Бироқ мен буни кўп марта таклиф қилганман, арманлар эса рад этган», — дея таъкидлаган давлат раҳбари.
Аввалроқ Илҳом Алиев Озарбайжонга тажовуз қилинса, Туркиядан ҳарбий ёрдам сўрашга тайёрлигини маълум қилганди.
Тоғли Қорабоғдаги Озарбайжон ва Арманистон ўртасидаги можаро 27 сентябрдан бошлаб жиддий тус олди. Икки томон бир-бирини ўт очишда айбламоқда. Минтақада бир неча марта ўт очишни тўхтатиш режими ҳақида эълон қилинди, бироқ бу режим ҳар сафар бузилди. CNN Turk телеканалининг дипломатик манбаларига таяниб, 9 ноябрь куни хабар беришича, Туркия президенти Ражаб Тоййиб Эрдўғон Россия президенти Владимир Путинга минтақадаги муаммони ҳал қилиш учун қўшма ишчи гуруҳ тузишни таклиф қилган.
Изоҳ (0)