Россиянинг Ми-24 ҳарбий вертолёти Арманистон ва Озарбайжон чегарасида ҳалокатга учради. Вертолёт кўчиб юрувчи зенит-ракета комплекси томонидан уриб туширилган. Бу ҳақда Meduza хабар берди.
Маълум қилинишича, ҳодиса Ераск қишлоғи яқинида юз берган. Бу қишлоқ Арманистон ва Озарбайжондаги Нахичевань автоном республикаси чегарасида — икки мамлакат ўртасидаги жанговар ҳаракатлар давом этаётган Тоғли Қорабоғдан 100 километрдан узоқроқ масофада жойлашган. Ераск қишлоғидан Туркия ва Эронгача бўлган масофа 10 километрдан камроқни ташкил қилади.
Ҳодиса оқибатида вертолёт экипажининг икки аъзоси ҳалок бўлган. Яна бир киши ўрта оғирликда жароҳат олган ва эвакуация қилинган. Вертолёт Арманистонда жойлашган Россия ҳарбий базаси томонга ҳаракатланаётган автокарвонни кузатиб бораётганди.
«РИА Новости»нинг ёзишича, вертолёт Озарбайжон томонидан тасодифан уриб туширилган ва Озарбайжон Ташқи ишлар вазирлиги буни тан олган.
Озарбайжон Ташқи ишлар вазирлигининг маълум қилишича, Тоғли Қорабоғ можаросида фаол жанговар тўқнашувлар юз бераётган бир пайтда вертолёт Арманистон—Озарбайжон чегарасининг яқинидан учиб ўтган ва у хатолик сабабли уриб туширилган.
Озарбайжон ТИВнинг қайд этишича, парвоз сутканинг қоронғи пайтида паст баландликда, ҳаво ҳужумига қаши воситаларнинг радарлари аниқлаши мумкин бўлган ҳудуддан ташқарида амалга оширилган. Бундан ташқари, ҳодиса юз берган ҳудудда аввал Россия вертолётлари қайд этилмаган.
Маълум қилинишича, минтақадаги таранг вазият ва «Арманистон томонининг эҳтимолий иғвоси» муносабати билан юқори ҳарбий тайёргарлик жорий қилингани сабабли навбатчи ҳарбий бўлинма нишонга ўт очишга қарор қилган.
«Озарбайжон томони тасодифий характерга эга бўлган ва Россия томонига қарши қаратилмаган мазкур фожиали ҳолат муносабати билан Россия томонидан узр сўрайди», — дейилади Озарбайжон Ташқи ишлар вазирлиги хабарида.
Озарбайжон томони ҳодиса оқибатида вафот этган экипаж аъзоларининг қариндошлари ва яқинларига ҳамдардлик билдирган ҳамда ҳодиса муносабати билан товон тўлашга тайёрлигини маълум қилган.
Эслатиб ўтамиз, Тоғли Қорабоғдаги Озарбайжон ва Арманистон ўртасидаги можаро 27 сентябрдан буён давом этмоқда. 31 октябрь куни Россия Ташқи ишлар вазирлиги Арманистон бош вазири Никол Пашиняннинг Россия президенти Владимир Путинга қилган мурожаати муносабати билан агар тўқнашувлар тўғридан-тўғри Арманистон ҳудудига ўтказилса, Россия расмий Ереванга ёрдам беришини маълум қилганди.
Арманистон бош вазири Никол Пашинян Германиянинг ARD телеканалига берган интервьюсида Қорабоғ низоси ҳудудига бошқа мамлакатлардан эмас, Россиядан тинчликпарварларнинг киритилиши энг самаралиси бўлиши мумкинлигини айтган.
Изоҳ (0)