Энергетика вазирининг ўринбосари Беҳзод Норматов айрим тадбиркорларнинг газ таъминотидан узилишига билдирган эътирозларига жавоб қайтарди, деб ёзмоқда «Gazeta.uz».
«Ҳеч ким таппи ёқиш, кўмир ёки ўтин ишлатишга ўтилади, дегани йўқ. Газ баллони сотиб олинади ва унга сиқилган газ тўлдирилади, сўнгра ошхоналарда табиий газ таъминоти ўчирилиб, махсус шланг орқали баллонга уланади, шунда муаммо ҳам бўлмайди», — деган у.
1 ноябрдан Ўзбекистонда хўжалик юритувчи субъектлар, хусусан, кафе ва ресторанларнинг табиий газдан фойдаланишига чекловлар белгиланган. Энергетика вазирлиги ушбу чора зарур экани, сабаби куз-қиш мавсумида ижтимоий соҳа объектлари ҳамда аҳолини табиий газ билан таъминлашга асосий эътибор қаратиш лозимлигини қайд этган.
Газ таъминотининг жорий инфратузилмасида табиий газнинг тенг тақсимланиши ва интенсификация қилинган истеъмол бўйича имкониятлар чекланган. Шу сабабли ҳам газ таъминотини меъёрлаштириш учун вақтинчалик махсус чоралар кўрилмоқда, бу орқали уйлар, квартиралар, мактаблар, мактабгача таълим ташкилотлари ҳамда шифохоналарга газ таъминотини етказиб бериш мумкин.
Шунингдек, Энергетика вазирлиги тадбиркорларнинг ҳаммаси сўнгги йилларда Ўзбекистонда сиқилган газ, кўмир ва бошқа муқобил энергия манбаларидан фойдаланиш орқали табиий газни тежаш дастури амалга оширилаётганидан хабардорлигини қайд этган.
Аввалроқ Spot нашри тадбиркорларнинг вужудга келган муаммолар нафақат нарх-навога, балки бизнесга ҳам кучли зарба бериб, овқатланиш соҳасини инвестициялар учун ноқулай йўналишга айлантириши ҳақида фикр билдираётганлигини ёзган эди.
«Ёшлар» телеканалининг «Давр» информацион дастурида ҳам тадбиркорларнинг бу борадаги норозиликлари хусусида лавҳа эфирга берилган. Овқатланиш муассасаси эгаларидан бири Наргиза Файзиева тадбиркорларнинг газ таъминотидан ноябрь бошидан узиб қўйилишига тайёр эмаслигини билдирган.
«Биринчида, бунда ишчи ўринлари қисқариб кетади. Иккинчидан эса, тушум камайиб кетиши мумкин», — деган тадбиркор аёл.
Яна бир тадбиркор Алишер Одилов компаниясида 300 дан 350 нафаргача ходим ишлаши, газ бир кунга ўчиб қолса ҳам, ходимлари ишсиз қолиши, давлат бюджетига солиқ тушумлари тўхтатишини айтган.
Энергетика вазирининг ўринбосари Беҳзод Норматов тадбиркорлар билан келишувларда уларга уч ойга етадиган захира ёқилғисини ғамлаб қўйиш масъулиятини юклайдиган банд мавжуд эканини қайд қилган.
«Яъни барча улгуржи истеъмолчилар, бизнес субъектлар бундан хабардор. Хабари йўқлар келишувни топиб, қайта ўқиб олиши мумкин… Чекловлардан мақсад уларни газ таъминотидан тўлиқ узиб қўйиш эмас. Ҳеч ким таппи, кўмир ёки ўтин ёқишга ўтилсин деяётгани йўқ. Газ баллони сотиб олинади, унга сиқилган газ тўлдирилади, сўнгра ошхона табиий газдан узилиб, газ баллони махсус шланг орқали улаб қўйилади. Муаммо йўқ», — деган вазир ўринбосари.
Телевидение орқали эфирга берилган лавҳада мутахассис газнинг аҳоли учун етарли даражадаги ҳажмда тарқатилаётгани, бироқ айрим тадбиркорларнинг газни ўғирлаши туфайли ёқилғи керакли манзилга тўлиқ ҳажмда етиб бормаётганини таъкидлаган.
«Рақамлаштириш бўйича кенг кўламли ишлар амалга оширилмоқда, онлайн ҳисоблагичлар ўрнатилмоқда. Давлат ҳар бир уйга ўз ҳисобидан газ ҳисоблагичини ўрнатмоқда ва бунинг учун 500 миллион доллардан зиёд маблағ сарфланди. Ҳисоблагичлар келажакда бу каби ўғриларнинг ҳаракатларидан бошқалар зиён кўрмаслиги учун ўрнатиляпти», ― дейди Норматов.
Аввалроқ Беҳзод Норматов 2020 йилда «Лукойл» Ўзбекистон ички бозорига 5 миллиард куб метр газни реализация қилинганини билдирганди.
Изоҳ (0)