«Dori-Darmon» 2020 йил учун ўз натижаларини кескин яхшилашга муваффақ бўлди. Бу ҳақда Давлат активларини бошқариш агентлиги маълумотларида ахборот берилган.
Компания аввалги икки йилни мос равишда 56 миллиард ҳамда 48,3 миллиард зиён билан якунлаган, бироқ 2020 йил III чорагида 30,7 миллиард сўм соф фойда кўрган.
Компаниянинг 2018 ва 2019 йиллардаги даромади мос равишда 69,5 миллиард ва 57,1 миллиард сўмни ташкил қилган, 2020 йилнинг ортда қолган даврида эса 132,9 миллиард сўм даромад олган. Активлар рентабеллиги уч йил ичида илк бор манфийдан мусбат даражага ўзгарган. Капитал рентабеллигида ҳам кескин кўтарилиш кузатилган.
Компания икки йил ичида 149 миллиард сўм кредитор қарздорликни 93,4 миллиардгача камайтирган. Бошқа компанияларнинг «Dori-Darmon»дан дебитор қарздорлиги эса 52 миллиарддан 129,4 миллиардгача ўсган. Компания аввалги йилларда ўртача йилига 6,7 миллиард сўм солиқ тўлаган бўлса, 2020 йилнинг ортда қолган даврида деярли 9 миллиард сўм солиқ тўлаган.
2018 йил охирида «Dori-Darmon» бошқаруви АҚШнинг United Investment Healthcare Group компаниясига 5 йил муддатга топширилган, бироқ 2019 йил баҳорда келишувнинг бекор қилингани ҳақида хабар берилганди. «Dori-Darmon» давлат улушлари хусусийлаштирилаётган компаниялар сирасига киради, давлат улушларининг 36,1 фоизи сотилиши режалаштирилган.
Изоҳ (0)