2020-yilda “Lukoyl” O‘zbekiston ichki bozoriga 5 milliard kub metr gazni realizatsiya qildi. “Gazeta.uz”ning xabar berishicha, bu haqda matbuot anjumanida Energetika vaziri o‘rinbosari Behzod Normatov ma’lum qildi.
Energetika vaziri o‘rinbosari Rossiya kompaniyasi “zangori yoqilg‘i” eksportini butunlay to‘xtatgani haqidagi xabarlarni rad etdi.
“Pandemiya tufayli asosiy iste’molchimiz Xitoydan talab kamayganligiga eksportimiz ham qariyb 5 baravarga kamaydi. Lukoyl bu borada eksportini to‘xtatgani yo‘q”, — degan u.
Behzod Normatovning aytishicha, “Lukoyl” eksport hajmini kamaytirish va minimal darajada saqlashga qaror qildi, chunki kompaniya gazni “to‘g‘ri kelmaydigan narxda” eksport qilmaydi.
Shunga qaramay, biz “Lukoyl” bilan gaz hajmini ichki bozorga yo‘naltirish bo‘yicha muzokaralar olib bordik. Eksport hajmlari va eksport narxlari konfidensial ma’lumot hisoblanadi. Lekin O‘zbekiston bu yil “Lukoyl”dan birlamchi 5 milliard kub metr gazni kelishilgan narxda sotib oldi. Albatta, gaz eksport narxidan ancha past narxda sotib olingan. “Lukoyl” kompaniyasi bilan kelishuvimiz bor, qo‘shimcha talab kerak bo‘ladigan bo‘lsa, gazni kelishilgan narxlarda ichki bozorga yo‘naltirishimiz mumkin”, — degan Behzod Normatov.
2019-yilning martida “Lukoyl” tomonidan ichki bozorga yiliga 5 milliard kub metr miqdoridagi gazni oldindan to‘lov asosida o‘rtacha hisoblangan eksport netbekiga nisbatan 12,5 foizlik chegirma bilan yetkazib berish to‘g‘risidagi kelishuvga erishilgani ma’lum qilingandi.
2020-yilning oktabrida o‘tkazilgan yig‘ilishda Prezident Shavkat Mirziyoyev tabiiy gaz qazib olishni ko‘paytirish va ichki bozorga qo‘shimcha gaz yetkazib berish bo‘yicha topshiriqlar bergandi. Bunda yilning o‘tgan to‘qqiz oyida gaz qazib chiqarish deyarli 20 foizga kamaygan, ya’ni 44,8 milliarddan 36 milliard kubometrgacha. Gaz kondensati esa 35 foizga yoki 1,5 million tonnadan 1 million tonnagacha kamaygan.
2020-yilning iyulida “Lukoyl” kompaniyasi koronavirus sabab Xitoyda gazga bo‘lgan talab kamayib ketgani bois O‘zbekistonda gaz qazib olishni loyiha quvvatidan 40 foizga qisqartirgani ma’lum qilingandi. Natijada kompaniya gazni ichki bozorga yo‘naltirish bo‘yicha O‘zbekiston bilan kelishuvga erishdi.