Россиялик таниқли рэпер ва бастакор Алишер Валиев (тахаллуси Моргенштерн) 18 октябрь куни Instagram’да Mercedes-Benz E200 машинаси учун танлов ўтказгани ва унда Бухорода яшовчи @aza_1002 аккаунти эгаси Азим Абдуллаев ғалаба қозонгани ҳақида хабар берилганди.
Моргенштерн ўшанда ғолиб билан боғланган ва автомобилни шахсан ўзи Ўзбекистонга олиб келишини маълум қилган. Кейинроқ мусиқачи Ўзбекистонда хорижда ишлаб чиқарилган машина учун белгиланган божхона тўловлари миқдоридан хабар топгач ўз stories’ида видеохабар қолдирган.
«Ўзбекистонда машина учун божхона тўлови қанча эканини биласизми? Унинг нархи машина нархига тенг экан», — деган Моргенштерн. Рэпер чегаралар ёпиқлиги ва машинани мамлакатга олиб кириш қимматлиги сабабли уни етказиб беришда ҳукуматдан ёрдам сўраган.
Мусиқачи блогер Юрий Дудга берган интервьюсида Mercedes-Benz’ни танлов ғолибига етказиб бериш учун яна 2 миллион рубль тўлаши кераклигини айтган.
Mercedes-Benz’нинг яна бир халқона номи «Мерин», қўшиқчи ўз композицияларидан бирини ушбу машинага бағишлаган (унда ҳақоратли сўзлардан кўп фойдаланилган), қўшиқ Youtube’да 85 миллион мартадан кўпроқ кўрилган. Ҳисоб-китобларга кўра, Моргенштерн машина учун 4 миллион рубль (тахминан 51 минг АҚШ доллари) сарфлаган.
Ўзбекистон Давлат божхона қўмитаси «Kun.uz» нашрига жисмоний шахслар Ўзбекистонга автомобиль олиб кирганда олинадиган божхона тўлови ҳақида маълумот тақдим этди.
«Мурожаатингизда кўрсатиб ўтилган автотранспорт воситаси ТИФ ТНга мувофиқ 8703 23 198 1 коди билан таснифланган тақдирда, амалдаги қонун ҳужжатларига асосан божхона қийматидан 30 фоиз ҳамда двигатель ҳажмининг ҳар бир куб сантиметри учун 2,5 АҚШ доллари миқдорда импорт божи, 15 фоиз миқдорда ҚҚС, божхона қийматидан 0,2 фоиз божхона расмийлаштируви учун йиғим, БҲМнинг 120 баравари миқдорида утилизация йиғими ставкалари қўлланилади», — дейилади қўмита хабарида.
Давлат божхона қўмитасининг дастлабки ҳисоб-китобларига кўра, божхона қиймати 538 713 760 сўмлик сумма асосида божхона тўловлари ҳисобланганда ундирилиши мумкин бўлган миқдор 353 801 986,83 сўмни ташкил этди.
Қайд этилишича, агар товарнинг келиб чиқишига доир маълумотларда номувофиқлик тасдиқланса, божхона божининг ставкаси икки баравар орттирилган ҳолда ҳисобланади. Бунда дастлабки ҳисоб-китобларга кўра, божхона тўловларининг миқдори 598 959 482,13 сўмни ташкил этди.
Эслатиб ўтамиз, 24 октябрда Олий Мажлис Қонунчилик палатаси депутатлари Расул Кушербаев, Дониёр Ғаниев ҳамда Бекмирза Эшмурзаев Молия вазирлиги ва Давлат божхона қўмитасига импорт машиналар бож тўловига оид депутатлик сўрови юборган. Мазкур сўровга Давлат божхона қўмитаси махфий жавоб қайтарган.
Аввалроқ Chevrolet Equinox Ўзбекистонда қарийб 34 минг доллардан сотилаётгани, UzAuto Motors эса уни АҚШ компаниясидан 22,8 минг долларга сотиб олаётгани ҳақида хабар берилганди.
Изоҳ (0)