Ўзбекистон соғлиқни сақлаш вазирининг ўринбосари Абдулла Азизов ўзининг Facebook’даги саҳифаси орқали Президент Шавкат Мирзиёев Соғлиқни сақлаш вазирлигини бошқа бинога кўчиришга розилик берганини ёзиб қолдирди.
Ҳар сафар Президент билан суҳбатда улардан роса кучли энергия оламан. Кеча 3-суҳбатим бўлган бўлса, роса кучли энергия олдим. Ким Президент билан суҳбат қилган бўлса, буни яхши тушунади. «Халқим, юртдошларимиз, аҳолимиз», деганларида юракдан чиқишини гаплашган одам жуда яхши ҳис қилади ва энергияга тўйиб олади.Вазир ўринбосарининг хабарида вазирлик учун алоҳида янги бино қуриладими ёки у пойтахтда мавжуд бинолардан бирига кўчадими, бунга аниқлик киритилмаган.Ҳурматли Президент, сизга катта раҳмат! Кеча ҳамма таклифларимга розилик берганингиз учун, Соғлиқни сақлаш вазирлигига бошқа катта бино истагимга розилик берганингиз учун, ҳар бир чиққан ҳамкасбларимни қўллаб-қувватлаганингиз учун. Олдимизга қўйилган жуда улкан вазифаларни вақтидан аввал ва виждонан, фидокорона амалга ошириб, юртдошларимизга кучли соғлиқ улашиб, умрларини узайтириб, сиз ва халқимизнинг олдида юзимиз ёруғ юриши насиб эцин.
Абдулла Азизов, соғлиқни сақлаш вазирининг ўринбосари
Эслатиб ўтамиз, 19 октябрь куни бўлиб ўтган видеоселектор йиғилишида Президент Шавкат Мирзиёев 2021 йилда соғлиқни сақлаш соҳасига қарийб 20 триллион сўм, шундан коронавирусга қарши курашиш тадбиралари учун 3 триллион сўм ҳамда дори-дармон харидига 1,8 триллион сўм ажратилиши кўзда тутилганини маълум қилган эди.
Маълумот учун, Абдулла Азизов 2006 йилда Даниянинг Орхус техника коллежини IТ-дастурчи мутахассислиги бўйича тамомлаб, ушбу йўналишда меҳнат фаолиятини бошлаган. 2019 йилнинг май—август ойларида қўмитада эксперт сифатида фаолият олиб борган. 2019 йилнинг сентябрида эса Солиқ қўмитаси раисининг IТ-технологияларини жорий қилиш бўйича ўринбосари этиб тайинланганди.
У 2019 йилда IТ-технологиясидан фойдаланган ҳолда пахта терими жараёнида инсон иштирокини камайтириб, пахта унумини оширишишга бағишланган танлов ўтказмоқчи бўлган ва ғолибга 200 минг доллар ваъда қилганди. Шу йилнинг июлида Президент қарори билан Азизов соғлиқни сақлаш вазирининг ўринбосари этиб тайинланган.
Президент Шавкат Мирзиёев 6 ноябрь куни соғлиқни сақлаш тизимининг бирламчи бўғинини такомиллаштириш ҳамда аҳоли ўртасида соғлом турмуш тарзини шакллантириш чора-тадбирлари юзасидан ўтказилган видеоселектор йиғилишида Абдулла Азизов ҳақида тўхталиб ўтиб, Ўзбекистон тиббиётига тезроқ рақамлаштириш ва телемедицинани олиб кириш кераклигини таъкидлаб, унга қўрқмасликни тайинлаганди.
«Ўзбекистонга келганингдан ва янгича тажрибалар билан оғир шароитларда бизга елкадош эканингдан миннатдорман. Эсингдан чиқарма, тиббиётимизга тезроқ ўзинг айтган рақамлаштиришни олиб киришимиз керак. Тиббиёт муассасаларига телемедицинани олиб киришимиз керак. Қўрқма, ортингда мен турибман», — деган эди Шавкат Мирзиёев.
Изоҳ (0)