Тошкент вилояти Санитария-эпидемиология осойишталик маркази собиқ раҳбари Бахтиёр Болтабоев коронавирусга қарши кураш тадбирлари учун ажратилган маблағларни ўзлаштиришда гумон қилинмоқда. Бу ҳақда бош прокурор Ниғматилла Йўлдошев 7 ноябрь куни коррупциянинг олдини олиш масалаларига бағишланган идоралараро йиғилишда маълум қилди, дея хабар бермоқда «Дарё» мухбири.
«Тошкент вилояти Санитария-эпидемиология осойишталик марказининг раҳбари Болтабоев шериклари билан бирга вирусга қарши тадбирлар учун ажратилган 1,1 миллиард сўмни ўзлаштирган. Мазкур ҳолат юзасидан жиноят ишлари қўзғатилиб, ҳозирда тергов ҳаракатлари ўтказилмоқда», — деб таъкидлаган Ўзбекистон бош прокурори ўз чиқишида.
Бахтиёр Болтабоев 2020 йилнинг июнь ойида, ўз хизмат хонасида қўл остидаги ходимларни ҳақоратлаётгани акс этган видеоёзув ижтимоий тармоқларда тарқалиб кетганидан сўнг танилган эди. Видеода Болтабоев, жумладан, (катта эҳтимол билан Баҳодир Юсупалиевни назарда тутган ҳолда): «Кўрдингизми, Баҳодир Қаҳрамонович қандай сўкади ҳаммани, кўрдингизми, ҳокимларнинг олдида қандай сўкяпти ҳаммани? Мана шундай ишлацангиз ишлайди булар», деган.
Кўп ўтмай Болтабоев ўз ходимларидан, ҳамкасбларидан ва касаба уюшма вакилларидан узр сўрагани акс этган видеоёзув эълон қилинган, шунга қарамай, «қўл остидаги ходимлари билан ўта қўпол ва ахлоқий меъёрларга тўғри келмайдиган тарздаги суҳбати» учун шу куниёқ соғлиқни сақлаш вазири биринчи ўринбосари Баҳодир Юсупалиевнинг тегишли буйруғи билан эгаллаб турган лавозимидан озод қилинган эди.
Изоҳ (0)