АҚШнинг янги сайланган президенти Жо Байден қиш яқинлашаётгани учун коронавирус пандемияси оқибатида ўлим ҳолатлари ортиши мумкинлиги сабаб яқин кунлар ичида барча штатларнинг губернаторларига қўнғироқ қилиб, уларни ниқоб тақиш мажбуриятини жорий этишга чақиради. Бу ҳақда Байденнинг катта маслаҳатчисига таяниб, NBC News хабар берди.
Унинг айтишича, губернаторлар янги президентнинг илтимосларига қарши чиқса, Байден шаҳар мэрларига босиб ўтказиб, республикачи губернаторлар билан қарама-қарши қилиб қўяди.
«Агар губернаторлар рад этса, у штатлар мэрларига боради ва улардан ниқоб тақишни мажбурий этишни сўрайди. Кўплаб штатларда мэрлар мандатларни ўрнатиши мумкин», — дейди маслаҳатчи.
Таъкидланишича, Байден жамоаси ниқоб тақиш талабини федерал муассасаларда ҳам жорий этиш ниятида. Бу ишни амалдаги президент Дональд Трамп администрацияси мамлакат раҳбарининг ўзи ва қатор олий мартабали амалдорлар ҳамда уларнинг ёрдамчилари, жумладан, администрация раҳбари Марк Медоуз коронавирусга чалинганида ҳам амалга оширмаган эди.
Маслаҳатчининг сўзларига кўра, кейинги қадам АҚШ аҳолисининг коронавирусга тестдан ўтказиш бўйича миллий режани ишлаб чиқиш бўлади. Байден ўз жамоасини қонунчилик ҳамда тест режасини тузиш учун ижро буйруқларининг бажаришига йўналтиради.
Ҳозирги кунда АҚШнинг 20 дан ортиқ штатида жамоат жойларида ниқоб тақиш мажбурий этиб белгиланган. Гап Калифорния, Коннектикут, Делавэр, Иллинойс, Канзас, Кентукки, Мен, Мериленд, Массачусетс, Мичиган, Невада, Нью-Йорк, Нью-Жерси, Нью-Мексико, Шимолий Каролина, Орегон, Пенсильвания, Род-Айленд, Виржиния, Вашингтон ва Ғарбий Виржиния ҳақида кетмоқда.
Жонс Ҳопкинс университети маълумотларига кўра, АҚШда коронавирусга чалинганлар сони 9,8 миллиондан ошган. Пандемия бошланганидан буён мамлакатда 237 мингдан ортиқ одам коронавирус оқибатида вафот этган, 3,8 миллион бемор соғайган.
Аввалроқ АҚШ президентлигига Демократлар партиясидан номзод бўлган Байден ва вице-президентликка номзод Камала Харрис ўз ғалабалари ҳақидаги дастлабки маълумотлардан сўнг халққа мурожаат билан чиқиш қилиб, мамлакатнинг дунё олдидаги ҳурматини қайтаришга ваъда берган эди.
Изоҳ (0)