АҚШ президенти сайловларида ғалаба учун зарур миқдордаги овозларни қўлга киритган Демократлар партиясидан номзод Жо Байден январда лавозимига киришганидан кейин коронавирус пандемияси туфайли келиб чиққан инқирозга дуч келади. Бу ҳақда Financial Times соғлиқни сақлаш соҳасидаги экспертларга таяниб хабар бермоқда, деб ёзади «РБК». Уларнинг огоҳлантиришича, мамлакатда COVID-19’га чалиниш ҳолатлари сони кескин ўсиб кетади.
Байден коронавирус инфекциясига қарши кураш унинг маъмуриятининг бирламчи вазифасига айланишини ваъда қилган эди. 9 ноябрь куни у экспертлар гуруҳини йиғиши, улар эса тегишли режани ишлаб чиқишни бошлаши кутилмоқда. Шунга қарамай, экспертлар фикрича, Байден «потенциал ҳалокатли вазиятни мерос қилиб олади», бу касалланганлар ва шифокорларнинг маслаҳатларига қулоқ солмайдиган аҳоли сонининг кескин ўсиши ҳолатидир.
«Жо Байден ва бутун мамлакат яқин ҳафталар ва ойларда улкан муаммо билан тўқнаш келади… Мамлакатнинг кўплаб ҳудудларида вирус назоратдан чиқишга улгурди, бу эса унинг янада тарқалиб кетиши учун жуда қулай шароит», — деди касалликлар назорати ва профилактикаси марказларининг собиқ раҳбари Том Фриден.
Колумбия университети вирусологи Анжела Расмуссен қайд этишича, америкаликлар сўнгги тўрт ой мобайнида COVID-19 туфайли доимий манипуляцияни ҳис қилган, энди эса фуқароларни ҳукумат уларни алдамаётганига ишонтириш учун «жуда қаттиқ ҳаракат қилиш керак бўлади».
7 ноябрь куни Американинг энг йирик ОАВлари томонидан президентлик пойгасининг ғолиби деб эълон қилинганидан кейин сўзлаган нутқида Байден унинг COVID-19’га қарши кураш режаси «илмий асосга эга бўлиши»ни айтган эди. Аввалроқ эса у президент этиб сайланса, бутун мамлакат ҳудудида мажбурий ниқоб тақиш режимини жорий қилишга ваъда берган эди. Бу режаларни демократлардан номзоднинг сайловолди штаби вакили тасдиқлади. Унинг сўзларига кўра, Байден тез орада губернаторларга ва йирик шаҳарлар мерларига қўнғироқ қилиб, уларни ниқоб тақишни мажбурий қилишга кўндиришни бошлайди.
Аввалроқ Жо Байден президентлик лавозимига киришгандан сўнг Дональд Трампнинг бир қатор фармонларини бекор қилишни режалаштираётгани хабар берилган эди.
АҚШ оммавий ахборот воситалари, хусусан, Associated Press, CNN, The New York Times, ABC News, Fox News ва бошқалар 7 ноябрь, шанба куни Жо Байденни АҚШнинг сайланган президенти деб эълон қилди. ОАВ ҳисоб-китобларига кўра, президентликка номзод – Демократик партиядан кўрсатилган собиқ вице-президент Жо Байден Пенсильвания штатида ғалаба қозонган ва президент сайловида ғолиб чиқиш учун танловчиларнинг камида 270 та овози керак бўлган ҳолатда 273 та овозни қўлга киритган.
АҚШнинг амалдаги президенти Дональд Трамп Американинг йирик оммавий ахборот воситалари Жо Байденнинг сайловларда ғолиб чиққанлигини эълон қилганидан кейин ҳозирча мағлубиятини тан олишдан бош тортди.
Танловчилар ҳайъати президентни расман 14 декабрь куни сайлайди.
Изоҳ (0)