АҚШ президенти Дональд Трамп доирасидаги кишилар уни сайловдаги мағлубиятини тан олишга чақиргани тўғрисидаги хабарлар ҳақиқатга тўғри келмайди. Бу ҳақда Оқ уй раҳбари сайловолди кампаниясининг маслаҳатчиси Жейсон Миллер маълум қилди, деб ёзади «Коммерсантъ».
Аввалроқ CNN телеканали ўз манбаларига таяниб, бундай қарорга Трампни куёви Жаред Кушнер ва рафиқаси Мелания оғдираётганини маълум қилган эди.
«Бу воқеа ҳақиқатга зид. Баъзи штатларда сайлов натижалари ноаниқлиги ҳамда овоз беришдаги жиддий қонун бузилишлари ва баъзи жойларда шаффофлик бўлмаганини ҳисобга олиб, Жаред Дональд Трампга овоз беришда аниқликни таъминлаш учун мавжуд барча ҳуқуқий ҳимоя воситаларидан фойдаланишни маслаҳат берди», — деб ёзди Миллер ўз Twitter’ида.
Сайловолди кампанияси маслаҳатчиси CNN’нинг Мелания Трампнинг позицияси ҳақидаги маълумотини ҳам ёлғон деб атади. Ўз навбатида, биринчи хоним Twitter’да сайловларда овозларни ҳаққоний ҳисоблашга чақирувчи твит қолдирди. «Америкаликлар ҳаққоний сайловларга муносибдир. Ноқонуний эмас, балки қонуний бўлган ҳар битта овоз ҳисобланиши керак. Биз тўла шаффофлик ёрдамида демократиямизни ҳимоя қилишимиз керак», — деб ёзди у.
Эслатиб ўтамиз, АҚШ оммавий ахборот воситалари, хусусан, Associated Press, CNN, The New York Times, ABC News, Fox News ва бошқалар 7 ноябрь куни Жо Байденни АҚШнинг сайланган президенти деб эълон қилди. Президент сайлови 3 ноябрь куни ўтиб бўлган, аммо уларнинг якуний натижалари почта орқали овоз берилганлиги ва сайловга рекорд даражада кўп (аввалги йиллардагидан 15 миллионга кўп) сайловчилар келганлиги туфайли кечикди. Байден президент сайловида ғолиб чиқиш учун танловчиларнинг камида 270 та овози керак бўлган ҳолатда 273 та овозни қўлга киритган.
АҚШнинг амалдаги президенти Дональд Трамп эса ҳозирча мағлубиятини тан олишдан бош тортди. Танловчилар ҳайъати президентни расман 14 декабрь куни сайлайди.
Изоҳ (0)