Қозоғистонда бир неча кундан буён COVID-19 билан касалланиш ҳолатлари ортмоқда, деб хабар беради Tengrinews. Соғлиқни сақлаш вазирлиги Жамоат соғлиғини сақлаш миллий маркази директори ўринбосари Бауржон Жусупов коронавируснинг иккинчи тўлқини қандай бўлиши ва аҳолида касалликка қарши иммунитет шаклланган ёки йўқлиги тўғрисида маълумот берган.
Жусуповнинг сўзларига кўра, «иккинчи тўлқин» деган атаманинг аниқ таърифи йўқ.
«Коронавирус инфекциясига чалиниш ҳолатларининг ортаётгани ҳақида гапиришим мумкин. Айни вақтда ростан ҳам COVID-19’га чалинаётганлар ортаётганини кузатяпмиз. Афтидан, бу иккинчи тўлқинга айланади. Унинг асосий фарқи — иккинчи тўлқин биринчисига қараганда узоқроқ давом этади», — дейди у.
Шунингдек, эксперт коронавирусга чалиниш ҳолатлари биринчидан кўпроқ бўлиши мумкинлиги ҳақидаги саволларга жавоб қайтарган.
«Биринчи тўлқиннинг энг юқори нуқтасида коронавирусга чалиниш ҳолатлари етарлича юқори бўлди, ҳатто кунига бир неча мингдан ошди. Бироқ касалликка чалинганларнинг реал сони рўйхатга олинган рақамлардан анча юқори. Ҳозир маълум муддат қайд этилаётганлар сони ёздагидан кўра юқори бўлади, аммо касалликка чалинганларнинг ҳақиқий кўрсаткичи камаяди», — дейди Жусупов.
Бундан ташқари, у 2020 йилда грипп сабаб юзага келган ўткир респираторли вирусли инфекцияларга чалиниш ҳолатлари камаяди. Шу билан бирга, таъкидланишича, ҳозирда кўплаб қозоғистонликларда коронавирусга қарши иммунитет шаклланган. Фақат унинг қанчалик самарадор эканлиги — ҳозирча номаълум.
Эслатиб ўтамиз, Қозоғистон пойтахти Нур-Султонда аҳоли орасида COVID-19 касаллиги тарқалиши ортиб бораётганлиги туфайли 14 октябрдан бошлаб янги чеклов ва карантин чоралари жорий этилган. 4 ноябрь куни эса Ғарбий Қозоғистон вилоятида коронавирус билан такроран касалланиш бўйича биринчи ҳолат қайд этилган.
Изоҳ (0)