AQShning yangi saylangan prezidenti Jo Bayden qish yaqinlashayotgani uchun koronavirus pandemiyasi oqibatida o‘lim holatlari ortishi mumkinligi sabab yaqin kunlar ichida barcha shtatlarning gubernatorlariga qo‘ng‘iroq qilib, ularni niqob taqish majburiyatini joriy etishga chaqiradi. Bu haqda Baydenning katta maslahatchisiga tayanib, NBC News xabar berdi.
Uning aytishicha, gubernatorlar yangi prezidentning iltimoslariga qarshi chiqsa, Bayden shahar merlariga bosib o‘tkazib, respublikachi gubernatorlar bilan qarama-qarshi qilib qo‘yadi.
“Agar gubernatorlar rad etsa, u shtatlar merlariga boradi va ulardan niqob taqishni majburiy etishni so‘raydi. Ko‘plab shtatlarda merlar mandatlarni o‘rnatishi mumkin”, — deydi maslahatchi.
Ta’kidlanishicha, Bayden jamoasi niqob taqish talabini federal muassasalarda ham joriy etish niyatida. Bu ishni amaldagi prezident Donald Tramp administratsiyasi mamlakat rahbarining o‘zi va qator oliy martabali amaldorlar hamda ularning yordamchilari, jumladan, administratsiya rahbari Mark Medouz koronavirusga chalinganida ham amalga oshirmagan edi.
Maslahatchining so‘zlariga ko‘ra, keyingi qadam AQSh aholisining koronavirusga testdan o‘tkazish bo‘yicha milliy rejani ishlab chiqish bo‘ladi. Bayden o‘z jamoasini qonunchilik hamda test rejasini tuzish uchun ijro buyruqlarining bajarishiga yo‘naltiradi.
Hozirgi kunda AQShning 20 dan ortiq shtatida jamoat joylarida niqob taqish majburiy etib belgilangan. Gap Kaliforniya, Konnektikut, Delaver, Illinoys, Kanzas, Kentukki, Men, Merilend, Massachusets, Michigan, Nevada, Nyu-York, Nyu-Jersi, Nyu-Meksiko, Shimoliy Karolina, Oregon, Pensilvaniya, Rod-Aylend, Virjiniya, Vashington va G‘arbiy Virjiniya haqida ketmoqda.
Jons Hopkins universiteti ma’lumotlariga ko‘ra, AQShda koronavirusga chalinganlar soni 9,8 milliondan oshgan. Pandemiya boshlanganidan buyon mamlakatda 237 mingdan ortiq odam koronavirus oqibatida vafot etgan, 3,8 million bemor sog‘aygan.
Avvalroq AQSh prezidentligiga Demokratlar partiyasidan nomzod bo‘lgan Bayden va vitse-prezidentlikka nomzod Kamala Xarris o‘z g‘alabalari haqidagi dastlabki ma’lumotlardan so‘ng xalqqa murojaat bilan chiqish qilib, mamlakatning dunyo oldidagi hurmatini qaytarishga va’da bergan edi.
Izoh (0)