БААда спиртли ичимликлар ичишга ва никоҳдан ўтмасдан бирга яшашга рухсат берилди

Бирлашган Араб Амирликларида спиртли ичимликлар ичиш ва никоҳдан ўтмасдан бирга яшаш энди жиноят ҳисобланмайди. The National нашри хабар беришича, мамлакат президенти Халифа ибн Заид ал-Наҳаён шахсий мақом тўғрисидаги қонунга, федерал жиноят кодексига ва федерал жиноят-просессуал кодексига тузатишлар киритишни тасдиқлаган. Бу сўнгги йиллар ичида энг катта кўламда ҳуқуқ тизимининг қайта кўриб чиқилиши бўлиб, у ажрашиш ва ворислик қоидаларидан тортиб, алкоголь истеъмолигача бўлган масалаларга тегишли бўлди.

Лицензиясиз алкоголь истеъмол қилиш

Газета қайд этишича, «зудлик билан кучга кирадиган қонунлар сайёҳларни ва тўғридан-тўғри хорижий инвестицияларни қўшимча жалб этишга, шунингдек, амирликлар аҳолиси учун қоидаларни соддалаштиришга қаратилган». Хусусан, тегишли лицензиясиз алкогол истеъмол қилиш ҳақидаги моддадан жиноят сўзи олиб ташланган, бу хусусий тартибда ёки бунинг учун махсус ажратилган жойларда спиртли ичимликларни истеъмол қилганлик, сақлаганлик ёки сотганлик учун лицензиясиз одам суд таъқибига учрамайди. Аммо аввалгидек 21 ёш чегараси сақланиб қолади. Вояга етмаганларга ичимлик сотишда қўлга тушганлар қонун бўйича жазоланади.

Алкоголь бўйича чекловлар БААда 2018 йилдан бошлаб аста-секинлик билан олиб ташланган. Ўшанда Абу-Дабида диний байрамлар арафасида ва байрам куни алкоголь истеъмол қилиш ва сотишга қўйилган тақиқ бекор қилинган эди. Ўша йилнинг сентябрида шу шаҳарда амирликлар фуқаролари учун лицензия — дўконлар, бар ва ресторанларда алкоголь сотиб олиш имконини берувчи махсус карта олиш қоидалари ҳам бекор қилинган эди. Дубайда эса картали тизим шу пайтгача сақланиб қолганди. Сайёҳлар ҳам вақтинчалик лицензия олиши шарт эди.

Никоҳдан ўтмасдан бирга яшаш

Бундан ташқари, Grazia нашри маълумотларига кўра, қонунчиликдаги ўзгаришлар энди қариндош бўлмаган ёки никоҳдан ўтмаган эркак ва аёлнинг бирга яшашига рухсат беради. 14 ёшдан ошганлар учун ўзаро розилик билан муносабатларга киришиш бошқа жиноят ҳисобланмайди. Аммо вояга етмаганларга ва ақлий қобилияти чекланган одамларга тажовуз қилганлик учун жазо кучайтирилмоқда — бундай жиноят учун ўлим жазоси белгиланган. Аёлларга нисбатан таъқиб ва жинсий зўравонлик учун ҳам янада қатъийроқ жазо кўзда тутилган.

Ўз жонига қасд қилиш

Жиноят кодексидан ўзини ўзи ўлдиришга уринганлик учун жазо ҳақидаги модда олиб ташланди. Шунингдек, кимгадир шошилинч ёрдам кўрсатган, аммо уни ўлимдан сақлаб қололмаган одамлар ҳам жавобгарликка тортилмайди.

Ворислик қоидаларининг ўзгартирилиши

Хорижий инвесторларнинг молиявий барқарорлигини таъминлаш мақсадида ворислик қоидалари янгиланди. Энди мерос вафот этган шахс келиб чиққан мамлакат протоколларига мувофиқ равишда амалга оширилади, агар васиятномада бошқача ҳолат кўрсатилмаган бўлса. Маҳаллий қонунлар БААдаги ҳар қандай хусусий мулкка нисбатан қўлланилади. Никоҳдан ўтиш ва ажрашиш шартлари эр келиб чиққан мамлакат эмас, никоҳ тузилган мамлакат қонунларига мувофиқ амал қилади.