«Ювентус» ҳужумчиси Криштиану Роналду А Серия 7-тури доирасида кечган «Лацио»га қарши ўйинда (1:1) жароҳат олди.
Португалиялик футболчи учрашувнинг 76-дақиқасида захирага олинди. Футболчи майдондан енгил оқсоқланган ҳолда чиқиб кетди.
Туринликлар устози Андреа Пирло унинг ҳолати ҳақида сўради ва Криштиану қуйидагича жавоб қайтарди: «Тўқнашув вақтида тўпиғимни қайириб олдим».
Ҳозирча футболчининг жароҳати борасида расмий хабар берилмади.
Эслатиб ўтамиз, Роналду А Серияда сентябрь ойидан бери илк бор «Ювентус» асосий таркибида майдонга тушганди. Футболчи Португалия терма жамоасининг октябрь ойидаги йиғинида коронавирус юқтириб олди ва маълум вақт ўйинларда иштирок эта олмаганди.
Криштиану Италия чемпионати жорий мавсумида 4 та ўйин ўтказиб, олтита голга муаллифлик қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)