Ўзбекистон Президенти Шавкат Мирзиёев раислигида 6 ноябрь куни ўтказилган соғлиқни сақлаш тизимини тубдан ислоҳ қилиш масалаларига бағишланган йиғилишда Андижон вилояти ҳокими Шуҳрат Абдураҳмонов ҳам сўзга чиқди.
«Дарё» мухбирининг хабар беришича, вилоят раҳбари ҳудудда тиббиёт тизимида олиб борилаётган ишлар тўғрисида гапираркан, Президентга ўзининг соҳага оид бир қанча таклифларини ҳам билдирди.
«Ҳурматли Президент, ҳозир биз тиббиёт тизимидаги квоталарни ўзимиз белгилай олмаймиз. Вилоятда кадрлар қаерга кераклигини биз ҳокимлар яхши биламиз. Шунинг учун, соғлиқни сақлаш вазири билан келишган ҳолда квоталарни ҳам шароитдан келиб чиқиб ўзимиз белгиласак.
Шунингдек, одамларимиз ҳозир соғлиғига жуда бефарқ. Улар аҳволи оғирлашиб йиқилмагунча тиббий текширувларга бормайди. Шу боис фуқароларга тиббий текширувлардан ўтишни мажбурий қилиш керак, назаримда. Мазкур тизимни рухсат берсангиз, Андижон вилоятида тажриба қилиб кўрсак», — деди Абдураҳмонов.
Шавкат Мирзиёев ушбу таклифлар бўйича соғлиқни сақлаш вазири тез орада вилоятга бориши, барча масалалар Халқ депутатлари вилоят кенгаши қарори билан амалга оширилишини таъкидлади.
Мавзуга доир:
- «Пойтахт шифохоналарида бирорта беморнинг иши, афсуски, пулсиз битмайди» — Шавкат Мирзиёев Тошкент шаҳар соғлиқни сақлаш тизими ҳақида
- Шавкат Мирзиёев: Тиббиёт тизимининг камида 50 фоиз иши аҳолини тўғри овқатланиш ва жисмоний тарбияга ўргатиш бўлиши лозим
- Шавкат Мирзиёев: Соғлиқни сақлаш вазирлиги фаолиятига, унинг кадрлар масаласига энди ҳеч ким аралашмайди
Изоҳ (0)