Ўзбекистонда сунъий интеллект усулларидан фойдаланган ҳолда COVID-19 билан касалланган беморлар ҳолати бўйича хавфни баҳоловчи веб-дастур ишлаб чиқилди, деб хабар беради «Kun.uz».
Дастур Ўзбекистон Фанлар Академияси Математика институти олимлари ва Республика шошилинч тиббий ёрдам илмий марказининг ташаббускор гуруҳи томонидан ишлаб чиқилган. Институт жамоасига профессор Фотима Одилова, марказ жамоасига эса Соғлиқни сақлаш вазири, профессор Абдуҳаким Ҳожибоев бошчилик қилган.
«Ушбу дастур оғир ҳолатнинг пайдо бўлиши ва сақланиб қолиш хавфини тезкор баҳолайди. Шунингдек, дастур рентген (КТ) текширув натижалари ва аускултация натижалари (қолган 10 кўрсаткични уйда ўлчаш мумкин) асосида хавф даражаси паст бўлган ҳолатларда амбулатория шароитида даволаниш тўғрисида ёки юқори (ўта юқори) хавф бўлган ҳолатларда дарҳол касалхонага ётқизиш тўғрисида автоматик тарзда тавсия беради», – дейилади Романовский номидаги Математика институти томонидан тақдим этилган маълумотда.
Қайд этилишича, республика шифохоналарида ўтказилган синовлар давомида дастурнинг ишончлилиги тасдиқланган ва дастурий маҳсулот Интеллектуал мулк агентлиги томонидан рўйхатдан (DGU 09206) ўтказилган.
«Ижодий гуруҳ дастурни тиббий стационарда COVID-19 билан касалланган беморларни бошқариш учун интеллектуал ёрдам кўрсатиш даражасигача такомиллаштириш бўйича тадқиқотларни давом эттирмоқда», – дейилади хабарда.
Эслатиб ўтамиз, шу йилнинг июль ўрталарида Ўзбекистонда коронавирусга чалинганлар билан яқин масофада бўлганларни огоҳлантирувчи мобил дастур яратилган эди.
Изоҳ (0)