Президент Шавкат Мирзиёев раислигида соғлиқни сақлаш тизимини ислоҳ қилиш масаласида ўтказилган йиғилишда бирламчи бўғиннинг камида 50 фоиз иши аҳолини тўғри овқатланиш ва жисмоний тарбияга ўргатиш бўлиши лозимлиги таъкидланди.
Жаҳон соғлиқни сақлаш ташкилоти таҳлилига кўра, тиббий даволаш инсон саломатлигини таъминлашнинг 10 фоиз омили, холос. Ирсий омиллар 15 фоиз, атроф-муҳит 20 фоиз ва, турмуш тарзи 55 фоизни ташкил этади.
Қайд этилишича, паст жисмоний фаоллик, меъёрдан кўп, айниқса, кечки пайт овқатланиш оқибатида аҳолининг қарийб 30 фоизида юқори қон босими ва 46 фоизида холестерин миқдори нормадан ортиқ. 60 фоиз ҳолатда коронавируснинг оғир кечиши нотўғри турмуш тарзидан келиб чиққан ёндош касалликларга боғлиқлигини кўрсатди.
Яъни, соғлом турмуш тарзи — тўғри овқатланиш ва жисмоний фаоллик орқали қанчадан қанча касалликларнинг олдини олиш ва инсонлар ҳаётини сақлаб қолиш мумкинлигини барча бирдек тушуниши кераклиги қайд этилди.
Шу билан бирга, фолий кислотаси ва темир моддаси етишмаслиги 40 фоиз аёлларда кузатилади, 5 ёшгача бўлган болаларнинг 55 фоизида темир моддаси етишмаслиги сабабли камқонлик келиб чиқмоқда. 70 фоиз боғча ва мактаб ёшидаги болаларда ичак паразитар касалликлар мавжуд.
Маълум қилинишича, 2021 йил 1 июндан бошлаб,
- 5 ёшгача бўлган болалар витаминлар ва микро-нутриентлар билан;
- 10 ёшгача болалар паразитларга қарши дорилар билан;
- ҳомиладорлар, эмизикли аёллар ва 15 ёшгача бўлган болалар ёд препаратлари билан;
- 35 ёшгача аёллар фолий кислотаси ва феррум билан бепул таъминланади.
«Нотўғри овқатланиш ва носоғлом турмуш тарзи қандай оғир оқибатларни келтириб чиқариши ёшларимизга болаликданоқ ўргатилиши керак», — деди давлат раҳбари.
Эслатиб ўтамиз, давлат раҳбари раислигида бўлиб ўтган йиғилишда Ўзбекистонда Сирдарё мисолида кафолатланган тиббий хизматлар ва дори воситалар пакетлари ишлаб чиқилиши, оилавий шифокорга ёрдам берадиган «тиббиёт бригадалари» ташкил этилиши, чекка ҳудудлардаги муассасаларга ишга кирган тиббиёт ходимларига 30 миллион сўм миқдорида бир марталик пул маблағи берилиши маълум қилинди. Ўзбекистоннинг ҳар бир вилоятида «тиббиёт кластерлари» ташкил этилади.
Изоҳ (0)