Sirdaryo viloyati Boyovut tumanida 1937-1950 yillarda O‘zbekiston Kompartiyasi Markaziy Komitetining birinchi kotibi lavozimida ishlagan Usmon Yusupovga byust o‘rnatildi, deya xabar bermoqda O‘zA.
Qayd etilishicha, 5-noyabr kuni Sirdaryo viloyatining Boyovut tumanida Usmon Yusupovga o‘rnatilgan byustning tantanali ochilish marosimi bo‘lib o‘tdi.
Byust Usmon Yusupov rahbarlik lavozimidan ketgandan keyingi taqdiri bilan bog‘liq bo‘lgan Boyovut tumanidagi kolxozda o‘zi yashagan hovlining markazida ochildi. Usmon Yusupov 1955-1960 yillarda 4-Boyovut sovxozida rahbar bo‘lib ishlagan.
Tantanali marosimni Sirdaryo viloyati hokimi G‘ofir Mirzayev ochib berdi va butun Sirdaryo xalqi nomidan Usmon Yusupovning Ikkinchi jahon urushidagi buyuk g‘alabaga hamda Sirdaryo viloyatining gullab-yashnashiga qo‘shgan hissasi uchun minnatdorligini bayon qildi.
Tadbirda Usmon Yusupov haqiga Qur’on tilovat qilindi. Shundan so‘ng boshlangan konferensiyada u bilan bevosita birga ishlagan mehnat faxriylari yoshlikdagi xotiralari bilan o‘rtoqlashdi.
Usmon Yusupov rahbarlik qilgan 4-Boyovut sovxozida ilk faoliyatini boshlagan davlat va jamoat arbobi Aziz To‘rayev u bilan o‘tgan davrlarini xotirlab, xalq orasida Usmon ota nomini olishiga sabab bo‘lgan xislatlariga to‘xtaldi.
Usmon Yusupovning qizi Zoya Petrosenko Moskva shahridan karantin sabab kelolmay qolganligi bois O‘zbekiston xalqidan minnatdorchilik izhorlarini audioyozuv orqali jo‘natdi. Konferensiyada yig‘ilganlarga qo‘yib eshittirilgan ushbu audioyozuvda Zoya Petrosenko otasining nomi qayta oqlanganidan, haqiqat qaror topganidan benihoya xursand ekanligini ham bayon etgan.
Konferensiya so‘nggida mehnat faoliyatini Usmon Yusupov qo‘l ostida boshlab, ko‘p yillar Sirdaryo viloyati va respublikada rahbarlik lavozimlarida ishlagan davlat va jamoat arbobi Aziz To‘rayev viloyat hokimligi tomonidan taqdirlandi.
Aziz To‘rayevning ko‘p yillik yurt oldidagi mehnatlari qadrlangan holda unga “Prezident sovg‘asi” – avtomashina berildi.
Ma’lumot uchun, Usmon Yusupov 1900-yil 1-mart kuni Farg‘ona tumanidagi Kaptarxona qishlog‘ida tug‘ilgan. O‘zbekiston Kompartiyasi Markaziy Komiteti kotibi (1928–31), VSSPS O‘rta Osiyo byurosi raisi (1931–34), O‘zbekiston SSR Oziq-ovqat sanoati xalq komissari (1936–37), O‘zbekiston Kompartiyasi MK 1-kotibi (1937–50), SSSR Paxtachilik ministri (1950–53), O‘zbekiston SSR Ministrlar Soveti raisi (1953–54), Mirzacho‘ldagi 4-Boyovut va 2-Boyovut sovxozlari va Yangiyo‘l tumanidagi “Xalqobod” agrar-sanoat birlashmasi direktori (1955-66) bo‘lib ishlagan.
Yusupov respublikaga rahbar bo‘lgan yillarda O‘zbekistonda xalq hashari yo‘li bilan yirik suv inshootlari (Katta Farg‘ona kanali, Kattaqo‘rg‘on suv ombori) qurilgan. 2-jahon urushi davrida mamlakat g‘arbidan ko‘chirib keltirilgan korxonalarni ishga tushirish, yangilarini qurish, frontni oziq-ovqat, kiyim-kechak bilan muntazam ta’minlash, o‘zbekistonliklarni fashizmga qarshi kurashga safarbar qilish, urush tufayli uy-joy va boshpanasiz qolgan aholi hamda yetim qolgan bolalarga mehribonlik va insonparvarlik qilishda Yusupov bosh-qosh bo‘lgan.
U 1966-yil 7-may kuni Toshkent shahrida vafot etgan.
Izoh (0)