Ўзбекистоннинг ҳар бир вилоятида йирик тиббий муассасалар асосида «тиббиёт кластерлари» ташкил этилади. Бу ҳақда Президент Шавкат Мирзиёев раислигида соғлиқни сақлаш соҳасини ислоҳ қилишга бағишланган видеоселектор йиғилишида маълум қилинди, дея хабар бермоқда «Дарё» мухбири.
Қайд этилишича, Гулистон шаҳридаги Шошилинч тиббий ёрдам кўрсатиш Республика илмий маркази филиали ва вилоят кўп тармоқли шифохонаси бир ҳудудда бўлиб, унга туташ ёки атрофида 10 га яқин тиббиёт муассасаси жойлашган. Уларни вилоят кўп тармоқли шифохонасига ягона бошқарув асосида бирлаштириб, «тиббиёт кластери»га айлантириш, тиббиёт коллежи негизида тиббиёт олийгоҳини ташкил этиш учун барча зарурий инфратузилма мавжудлиги кўрсатиб ўтилди.
«Ушбу тиббиёт муассасаларини вилоят кўп тармоқли шифохонасига ягона бошқарув асосида бирлаштириб, «тиббиёт кластери»га айлантириш, тиббиёт коллежи негизида тиббиёт олийгоҳини ташкил этиш учун барча зарурий инфратузилма мавжуд.
Шу орқали йилига қарийб 2,5 млрд сўмни иқтисод қилиб, шифохонанинг моддий-техник базасини яхшилаш ва тиббиёт ходимлари сонини ошириш мумкин», — деган Президент.
Соғлиқни сақлаш вазирлиги ва Сирдарё вилояти ҳокимлигига йил якунига қадар хорижий экспертларни жалб қилган ҳолда «Гулистон тиббиёт кластери»нинг лойиҳасини ишлаб чиқиб, ишни бошлаш вазифаси юклатилди.
Унга кўра, бу масалада ҳозирда Туркиянинг «Соғлиқ билимдони» университети билан музокара ўтказилмоқда.
Ҳар бир вилоят ҳокими бир ой муддатда ўз ҳудудида Сирдарё тажрибаси асосида, илғор хорижий клиникалар билан ҳамкорликда «тиббиёт кластерлари»ни ташкил этиш бўйича таклиф киритиши белгиланди.
Эслатиб ўтамиз, давлат раҳбари раислигида бўлиб ўтган йиғилишда Ўзбекистонда Сирдарё мисолида кафолатланган тиббий хизматлар ва дори воситалар пакетлари ишлаб чиқилиши, оилавий шифокорга ёрдам берадиган «тиббиёт бригадалари» ташкил этилиши, чекка ҳудудлардаги муассасаларга ишга кирган тиббиёт ходимларига 30 миллион сўм миқдорида бир марталик пул маблағи берилиши маълум қилинди.
Изоҳ (0)