Қашқадарё ҳокими Зоир Мирзаев вилоятда Халқ таълими бўлими мудирларига хизмат автомобиллари ажратилмаганини танқид қилганди. Бир ҳафта ўтиб вилоятдаги мавжуд 15 нафар ХТБ мудири ва бошқарма бошлиғига янги автомобиль топширилди, дея хабар берди «Дарё» мухбири.
Таъкидланишича, вилоят раҳбари иштирокидаги тантанали тадбирда Халқ таълими бошқармаси бошлиғига Gentra, қолган мудирларга эса Nexia-3 автомобили топширилган.
«Бир ҳафта илгари вилоят раҳбари биз билан мулоқотда тизимдаги муаммолар ҳақида сўраб, нега хизмат автомобили ажратилмагани билан қизиққанди. Мана бугун янги хизмат машинаси беришди. Демакки, вилоят ҳокими бизга шароит яратиб бериш орқали масъулиятимиз ортганини, эндиликда ҳокимларнинг таълим тизими бўйича маслаҳатчиси мақомида эканлигимизни эслатиб қўйди. Ўйлайманки, мен ва ҳамкасбларим бу эътиборга муносиб жавоб қайтарамиз», — дейди Қамаши туман халқ таълими бўлими мудири Назира Абраева.
Эслатиб ўтамиз, аввалроқ вилоятнинг Чироқчи туманидаги 61-мактабнинг қўрқинчли синфхоналари ижтимоий тармоқларда кўплаб муҳокамаларга сабаб бўлгач воқеалар ортидан тушган ОАВ вакиллари мазкур синфхоналарда икки йил давомида ўқувчиларга таълим берилганини фош қилди. Шундан сўнг вилоят ҳокими Зоир Мирзаев синфхоналарга ўтин киритиб, жамоатчиликни алдаган мактаб директори воқеасига алоҳида тўхталиб ўтди.
Чироқчидаги мактаб муҳокамасига бағишланган сессияда Зоир Мирзаев ХТБ масъулларига хизмат автомобиллари ажратилмаганини эшитгач Молия бошқармаси бошлиғига «Халқ таълими бўлими мудирлари мактабга поездга осилиб борадими?» деганди.
Мавзуга доир:
- Қашқадарёда маҳалла ва оилани қўллаб-қувватлаш бўлими бошлиғи ўринбосарларига ҳоким маслаҳатчиси мақоми берилиб, уларга хизмат автомобиллари топширилди
- Наманганда ҳоким маслаҳатчилари ва ахборот хизматлари раҳбарларига хизмат автомобиллари топширилди
- Андижонда санитария-эпидемиологик осойишталик марказларига хизмат автомобиллари топширилди
Изоҳ (0)