Ҳукуматнинг 3 ноябрдаги қарори билан инновацион ғоялар ва стартап экотизимини қўллаб-қувватлаш инфратузилмасини яратиш мақсадида UzVC миллий венчур фонди масъулияти чекланган жамият шаклида ташкил этилди.
Қарорда қайд этилишича, фонднинг бошланғич устав капитали 15 миллиард сўм миқдорида белгиланган.
Фонд бошқарувига малакали ва халқаро тажрибага эга чет эл фуқаролари жалб этилади. Тўрт ой ичида фонд фаолиятини амалга ошириш учун танлов асосида устав капиталида улуши бўлмаган мустақил хусусий бошқарув компанияси жалб этилади.
UzVC офиси Тошкентнинг Олмазор туманида жойлашган Инновацион ривожланиш вазирлигининг маъмурий биносида жойлашади.
Эслатиб ўтамиз, 2019 йилнинг 25 сентябрида ICT WEEK 2019 доирасида бўлиб ўтган Digital Uzbekistan форумида Ўзбекистонда биринчи венчур жамғарманинг ташкил этилиши ҳақида эълон қилинганди.
Шавкат Мирзиёевнинг 2018 йил 22 январда имзолаган «2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол тадбиркорлик, инновацион ғоялар ва технологияларни қўллаб-қувватлаш йили»да амалга оширишга оид Давлат дастури тўғрисида»ги фармонига кўра, венчур фондларга 2023 йилнинг 1 январига қадар солиқ имтиёзлари тақдим этилади.
Изоҳ (0)