Барча «ГАЗ-14» лимузинлари мутлақо қора рангга бўялган. Фақатгина биттасидан — энг биринчи нусхадан ташқари. 000001 тартиб рақамига ва олчаранг кузовга эга «Чайка» Совет Иттифоқи Коммунистик партияси (КПСС) Марказий қўмитаси бош котиби Леонид Брежневга 70 йиллик юбилейида совға қилинган, деб хабар беради CARakoom.
Биринчи «Чайка» мазкур қўмитада узоқ вақт хизмат қилган, шундан сўнг у партиянинг Ярославль шаҳри органларига топширилган, ундан кейин эса автомобиль хусусий қўлларга тушган.
Машина бир неча маротаба қўлдан қўлга ўтган ва охир-оқибат Германияга бориб қолган. Ҳозирда ушбу модель 9 миллион рубль нархида сотувга қўйилган.
«ГАЗ-14» лимузини ҳозирга қадар 72 588 километр йўл босган. Суратларга кўра, автомобиль деярли идеал ҳолатда сақланган. Кузов, хром, салон — барчаси янгидек.
Ушбу автомобилни бир неча йилдан буён сотишга уринишмоқда. Европа валютасидаги нархи ўзгаришсиз қолмоқда — 120 минг евро. Рублдаги қиймати эса мунтазам ошиб боряпти. 2019 йилда унинг қиймати 8,3 миллион рубль эквивалентга тенг эди.
«Чайка»лар 1977 йилдан 1988 йилга қадар ишлаб чиқарилган бўлиб, бу вақт оралиғида заводдан 1414 нусха чиққан. Шундан сўнг «имтиёзларга қарши кураш» доирасида автомобиль Горбачёвнинг буйруғи билан ишлаб чиқаришдан олинган. Шу билан бирга, барча технологик ускуналар, ишчи ҳужжатлар, йиғиш линиялари, кузов штамплари ва бошқа керакли жиҳозлар йўқ қилинган.
Аввалроқ АҚШнинг 33-президентига тегишли бўлган Lincoln лимузини аукционга қўйилгани тўғрисида хабар берилганди.
Изоҳ (0)