Канада пойтахтида ҳайдовчисиз бошқариладиган EХ10 автобуслари ҳаракатланадиган маршрут синов тариқасида ишга туширилди. Синовлар ноябрь ойининг ўрталарига қадар давом этади, деб хабар беради «Korrespondent.net».
Таъкидланишича, лойиҳани EasyMile компанияси Онтарио провинциясида автоматлаштирилган транспортларнинг синов дастури доирасида яратган. Унинг амалга оширилишини қатор ихтисослашган корхоналар, Оттава маъмурияти ва Онтарио Транспорт вазирлиги назорат қилади.
Автобус ҳаракатланадиган маршрут узунлиги 1,5 километрни ташкил этади. Автобуслар тўртта бекатда тўхтайди. Бироқ коронавирус эпидемияси сабаб йўловчилар сифатида фақатгина лойиҳа иштирокчиларидан фойдаланилмоқда.
Бундан ташқари, унинг салонида ҳайдовчи ҳам бўлиб, у фавқулодда ҳолатларда бошқарувни ўз қўлига олади.
Бу каби синовларни ўтказишдан мақсад — ҳайдовчисиз автобуслар ҳақиқий йўл шароитида қандай ишлашини кўрсатиб бериш, аккумулятордан фойдаланиш самарадорлигини таҳлил қилиш ва имконияти чекланган одамларнинг фойдаланиши учун имконият яратиш.
Аввалроқ Huawei’нинг ҳайдовчисиз бошқариладиган машинаси Таиланд ҳукуматига коронавирусга қарши курашда ёрдам бергани тўғрисида маълум қилинганди.
Изоҳ (0)