Флорида штатидаги автотураргоҳда турган Ford Mustang’нинг капоти остига улкан питон кириб олди. Автомобиль эгаси судралиб юрувчини ушлаш учун махсус хизмат ходимларини чақиришга мажбур бўлган. Мотор бўлмасидаги уч метрли илоннинг видеоси Америка ижтимоий тармоқларининг ҳақиқий хитига айланди, деб ёзади Motor.
Ҳаворанг Ford Mustang эгаси илонни автомобилни ўт олдирганида мотор бўлмасидан чиққан ноодатий шовқиндан сўнг пайқаб қолган. Маълум бўлишича, капот остида инсон фаолияти таъсирида Флорида штатига келиб қолган йирик илон — питон ўралиб ётган.
Флорида балиқлар ва ёввойи табиатни қўриқлаш комиссиясининг (FWC ) ҳисоблашича, бу каби йўлбарс-питонлар инвазив тур ҳисобланади (ҳудудга, атроф-муҳитга, инсон саломатлигига ёки иқтисодиётга зарар етказадиган бегона тур) ва уларга дуч келинганида хабар берилиши керак. Флоридада ушбу турга кирувчи питонлар зараркунанда ҳисобланади, шу сабабли FWC одамларни имкони борича бу каби илонларни ўлдиришга чақиради. Ёввойи табиатда йўлбарс-питонларнинг узунлиги 3-5 метрга етади.
Ижтимоий тармоқ фойдаланувчиларининг ёзишича, илон Mustang’дан чиқариб олингач у Super Snake бўлмай қолган. Умуман олганда, Флоридада йўлбарс-питонлар жиддий муаммо ҳисобланади, ҳукумат ҳар йили минглаб улкан илонларни тутишга мажбур.
Аввалроқ америкалик аёлнинг кир машинаси ичидан бўғма илон чиққани, аёл уни кийим деб ўйлаб, қўлига олгани тўғрисида хабар берилганди.
Мавзуга доир: Флоридада энг узун питон ўлдирилди (видео)
Изоҳ (0)