Наманган вилояти Норин туманида тунги чироқлар билан ёритилмаган ва пиёдалар ўтиш жойи талабга жавоб бермайдиган автомобиль йўлида Damas пиёдани уриб кетди, дея хабар бермоқда ЙҲХББ.
Маълум қилинишича, 2020 йилнинг 31 октябрь куни соат 23:30 ларда Норин тумани Чўжа–Ҳаққулобод йўлининг дастлабки километрида Damas автомобили пиёдани уриб юборган. Натижада пиёда воқеа жойида вафот этган.
ЙТҲ содир бўлган жой ЙҲХБ инспекторлари томонидан кўздан кечирилганда йўл тунги ёритиш чироқлари билан жиҳозланмагани аниқланган.
Норин тумани Ободонлаштириш бошқармаси Ташқи ёритиш бўлими бошлиғи Матяков Неъматжоннинг таъкидлашича, пандемия сабаб кўча чироқлари учун маблағ ажратилмай қолган.
«Воқеа жойига яқин бўлган пиёдалар йўлакчаси чизиқлари ўчиб кетган. Шу ҳафтанинг охирига белгиларни чиздириб қўямиз», – дейди туман Йўллардан фойдаланиш бўлими бошлиғи Бўстонов Лазизбек.
«Кўча чироқларини 2020 йилнинг 4-чорагида бюджет маблағларининг орттирилган қисмидан ўрнатиш таклифини берамиз. Йўл белгилари, пиёдалар йўлакчасини кўриб чиқамиз. Ҳафтанинг якунига ҳамма муаммолар бартараф этилади», – дейди Норин тумани ҳокимлиги Қурилиш котибияти мутахассиси Ортиқалиев Достон.
Норин тумани ИИБ бошлиғи хизмат бўйича ўринбосари, майор Турғунов Ҳусниддиннинг сўзларига кўра, 2020 йил якунида туман ҳокимияти маблағлар ҳисобидан йўлларга фоторадар қўйиш режалаштирилган.
Аввалроқ Самарқандда Damas велосипедчини уриб кетгани, Бухорода 69 ёшли фуқаро йўловчи поезди уриб кетиши оқибатида ҳалок бўлгани ҳамда Жиззахда «Жигули» эшак аравани уриб юбориши оқибатида икки киши ҳалок бўлгани ҳақида хабар берилганди.
Изоҳ (0)