Ўзбекистон Монополияга қарши курашиш қўмитаси Халқ таълими вазирлигининг «2021—2025 йилларда умумтаълим мактабларини мебель, ўқув-лаборатория асбоб-ускуналари, спорт анжомлари ва ўқитишнинг техник воситалари билан жиҳозлаш чора-тадбирлари тўғрисида»ги ҳукумат қарори лойиҳасини ўрганиб чиқди.
Қўмитанинг ўрганиш натижаларига кўра берган хулосасида қайд этилишича, кўп йиллар давомида мамлакатда айрим хўжалик юритувчи субъектларга эксклюзив ҳуқуқлар бериш орқали сунъий монополия яратилганлиги иқтисодиётда соғлом рақобат муҳити шаклланишига салбий таъсир кўрсатиб келмоқда. Бундай тизим бюджет маблағлари асоссиз сарфланишига олиб келади.
Қарор лойиҳасининг 4-банди учинчи хатбошида умумтаълим мактабларига мебель ва махсус ўрнатиш талаб этилмайдиган жиҳозларни етказиб бериш ва ўрнатиш ишлари ҳамда жиҳозларни таъмирлаш ишлари «Ўқув таълим-таъминот» давлат унитар корхонаси томонидан амалга оширилиши кўрсатилган.
«Ваҳоланки, мазкур вазифаларни давлат харидларида ғолиб бўлган ишлаб чиқарувчи ёки етказиб берувчилар (иш бажарувчи) томонидан бажарилиши лозим. Бу мантиқий ва молиявий томонлама мақсадга мувофиқ ҳисобланади, чунки товарларни жойларга етказиб беришда ва ўрнатишда уларни сифатига ва техник талабларга мувофиқлигига тендерда ғолиб бўлган корхона жавоб беради». — дейилади Монополияга қарши курашиш қўмитаси хабарида.
«Бунда ‘Ўқув таълим-таъминот’ ДУКнинг моддий-техника базасини мустаҳкамлашга давлат бюджети ҳисобидан (13 миллиард сўм) ортиқча маблағлар ажратилиши ҳамда алоҳида яна ушбу ДУК томонидан товарларни жойларга етказиб бериш ва ўрнатиш учун маблағлар ажратиш талаб этилмайди ва ўз навбатида бюджет маблағлари тежалади», — дейилади қўмита хулосасида.
Монополияга қарши курашиш қўмитаси қарор лойиҳасидан юқоридаги бандни чиқариб ташлаш лозим, деб ҳисобламоқда.
Лойиҳага кўра, 2021—2025 йилларда 5046 та мактаб (120 мингдан ортиқ ўқув хоналарини) жиҳозлаш режалаштирилган.
Изоҳ (0)