Тошкентнинг Олмазор тумани ҳудудида қурилаётган Ислом цивилизацияси маркази сабаб ҳудуддаги 237 та хонадон бузилди. Бу ҳақда туман ҳокимлиги ахборот хизмати хабар берди.
Маълум қилинишича, маҳаллий аҳоли Яшнобод туманидаги Махтумқули кўчасида жойлашган «Яшил боғ» турар жой мажмуасидаги янги қуриб фойдаланишга топширилган кўп қаватли уйларга кўчиб ўтмоқда.
«Улар ҳам кўркам, ҳам ёруғ, ҳам кенг ва шинам янги хонадонлардан мамнунлар», — дейилади хабарда.
Таъкидланишича, ислом дини ривожланиши йўлида хизмат қилувчи Ислом цивилизацияси маркази қурилиши учун жами 241 та хонадон бузилишга тушган бўлиб, ҳозирга келиб уларнинг 237 таси бузиб бўлинган. Олмазор тумани ҳокимлиги қошида ташкил этилган махсус комиссия хулосасига асосан ушбу хонадонлар эгаларига уй-жойлар ажратилган. Ҳозирги кунда қолган 5 та хонадон эгаларига эса уй-жойларни ажратиш ишлар олиб борилмоқда.
«Яқин кунларда уларнинг уйларида ҳам бузилиш ишлари олиб борилади. Бу жараён 10 ноябрга қадар якунланиши режалаштирилган», — дейилади хабарда.
Эслатиб ўтамиз, марказ биноси 2020 йил кузда фойдаланишга топширилиши режалаштирилган эди. 2020 йил ноябрь ойида Ўзбекистон Ислом ҳамкорлик ташкилотининг фан ва технологиялар соҳасидаги ҳамкорлик бўйича Доимий қўмитаси саммитига мезбонлик қилиши керак.
2019 йилнинг декабрида Ислом цивилизацияси марказида ёнғин юзага келгани, ёнғин оқибатида қурилаётган бино ертўласида жойлашган, таъмирлаш учун олиб келинган теплоизоляция (пенопласт) қурилиш материаллари 150 квадрат метр майдонда ёнгани тўғрисида хабар берилганди.
Изоҳ (0)