Нидерландияда коронавирус сабаб карантин чоралари кучайтирилди. Мамлакатда музей, театр, казино, кинотеатр, кўнгилочар парклар ва хизмат кўрсатиш соҳасидаги бошқа ташкилотлар ёпилди. Ҳукумат коронавирусга қарши кураш йўлида комендантлик соати ва мактабларни ёпиш каби тўлиқ локдаунга ўтиш эҳтимоллигини истисно этмаган, деб хабар беради «Коммерсантъ».
Мамлакатда янги чекловлар 17 ноябрга қадар амалда бўлади, шундан сўнг Нидерландияда олдинги чеклов режимларига қайтилади. Ўрнатилган чекловлар рўйхати билан ҳукумат сайти орқали тўлиқ танишиш мумкин.
Шунингдек, Нидерландия ҳукумати аҳолига январь ойи ўрталарига қадар саёҳатларни режалаштирмасликни тавсия қилган. Мамлакатда рухсат этилган намойиш ва йиғилишлардан ташқари жамоат тадбирларни ўтказиш тақиқланган. Вояга етганлар ижтимоий масофаланишга риоя қилган ҳолда спорт билан шуғулланиши мумкин. Дўконлар соат 20:00 гача ишлайди ва соат 20:00 дан 7:00 га қадар алкогол маҳсулотлари сотилмайди.
Швейцариянинг Во ва Фрибур кантонлари (кичик маъмурий-территориал бўлинма) коронавирус тарқалиши давом этаётгани сабаб фавқулодда ҳолат режимини эълон қилди. Олдинроқ бу каби қарорни Женева, Юра ва Нёшатель кантонлари қабул қилганди.
Француз тилида сўзлашувчи кантонларда карантин ноябрь охирига қадар амалга бўлади. Бу давр оралиғида барча ресторан ва барлар ёпилади. Во кантонида дўконлар, гўзаллик салонлари ва мактаблар хавфсизлик чораларига риоя қилган ҳолда ишлашни давом эттириши мумкин. Фрибурда эса дўконлар, спорт марказлари, бассейнлар, кўнгилочар масканлар ёпилади.
Грузия ҳукумати мамлакат аҳолисига нафақат бинолар ичида, балки кўчаларда ҳам ҳимоя ниқобида юзиш мажбуриятини қўйди, деб хабар беради «Korrespondent.net». Маълум қилинишича, ниқобга оид қоидаларни бузган шахслар 6 доллар жаримага тортилиши мумкин.
Бундан ташқари, бутун мамлакат бўйлаб ресторанлар фаолияти чекланган. Улар соат 22:00 дан сўнг ёпилиши керак. Бунга қадар шу турдаги чекловлар Тбилиси, Месхете, Кутаиси ва Батумида ҳам жорий этилганди. Шунингдек, кўплаб мактаблар ноябрь охирига қадар масофавий таълим режимини сақлаб қолади.
Венгрияда ҳам COVID-19’га қарши кураш доирасида бутун мамлакат бўйлаб ярим тундан соат 5:00 га қадар комендантлик соати жорий этилди. Шунингдек, барлар ва бошқа кўнгилочар масканлар ёпилмоқда. Таъкидланишича, мамлакатдаги «алоҳида режим» 4 ноябрь ярим тундан кучга киради.
Венгрия бош вазири Виктор Орбаннинг таъкидлашича, у парламентдан чекловларни 90 кунга узайтиришни сўрайди.
Шу билан бирга, мамлакатда таълим муассасалари, дўкон ва ресторанлар одатдаги режимда ишлашни давом эттиради. Маданий ва спорт тадбирлари чекланган одамлар иштирокида ўтказилади.
Аввалроқ Норвегия, Франция ва Украинада карантин чоралари кучайтирилгани, Португалияда аҳолининг мамлакат бўйлаб ҳаракатланишини тақиқлаб қўйилгани тўғрисида хабар берилганди. Шунингдек, Австрия қайта карантин жорий этган, Англияда эса декабрь бошигача локдаун эълон қилинганди.
Изоҳ (0)