Meduza нашри АҚШда президент сайлови куни қандай ўтгани ҳақида қисқача маълумот бериб ўтди.
Жо Байден АҚШ президенти сайловларида етакчилик қилмоқда, аммо якуний натижаларни чиқариш кўп вақт олмоқда. Кўплаб прогнозларга қарамасдан, демократлардан номзод ишончли ғалабага эриша олмади. Сайловолди сўровлар Байден ўз рақиби Дональд Трампдан тахминан 10 фоизга олдинда эканлигини кўрсатган. Октябрь ўрталарида, асосий сайлов кунидан уч ҳафта аввал ўтказилган сўровлардан бири эса 17 фоизлик фарқни кўрсатган эди: 57 фоиз Байден учун ва 40 фоиз Трамп учун. Ҳақиқатда эса овозлар деярли тенг тақсимланди.
2016 йилги сайловларда сўровлар натижалари ва экспертлар ҳисоб-китоблари Трампнинг мағлубиятини кўрсатган эди, аммо якунда у ўзининг демократлардан рақиби Ҳиллари Клинтон устидан ғалаба қозонди.
Сайловлар ғолиби баъзи «иккиланувчи» штатларда овозлар ҳисоблаб чиқилганидан кейин аниқланади. Булар — Шимолий Каролина, Жоржия, Пенсильвания (Байден туғилиб-ўсган), Мичиган ва Висконсин. Ушбу мақола ёзилаётган вақтда Шимолий Каролинада номзодлар ўртасидаги фарқ 1 фоиздан сал кўпроқ, Жоржияда — қарийб 2, Висконсинда — 4 фоизга тенг эди. Пенсильвания ва Мичиганда Трамп тахминан 10 фоизлик фарқ билан етакчилик қилмоқда, аммо у ерда ҳали овозларнинг учдан бир қисми ҳисоблаб чиқилмаган.
Сайловларда ғолиб бўлиш учун номзод сайловчилар коллегиясининг камида 270 та овозини қўлга киритиши керак. Тошкент вақти билан 12:00 да CNN Байден 220 та, Трамп 213 та овозга эга эканлигини маълум қилганди. The New York Times ҳисоб-китоблари бўйича — 225 тага 213 та, Fox News эса 238 тага 213 та овоз деб хабар бермоқда. Турли манбалар турлича ҳисобларни келтирмоқда, чунки улар нафақат овозларни ҳисоблашнинг жорий натижаларидан фойдаланади, балки турли штатларда демократлар ёки республикачилар учун анъанавий овоз бериш, сайловолди сўровлар якунлари ва ўз экспертларининг фикрларини ҳам ҳисобга олади.
Ҳар иккала номзод ҳам сайловларда ғолиб бўлаётганини маълум қилди. Байден Делавер штати Уилмингтон шаҳрида ўз тарафдорлари қаршисига чиқиб, «ғалаба сари тўғри йўлдамиз» деб нутқ сўзлади ва сабр қилиб туришга чақирди. Демократлардан номзоднинг сўзларига кўра, бюллетенлар «сон-саноқсиз» бўлгани учун сайловлар якунини чиқариш одатдагидан кўпроқ вақт олиши мумкин.
Дональд Трамп зудлик билан бунга муносабат билдирди ва Twitter’да «улар сайловларда ғалабани ундан тортиб олмоқчи бўлаётгани, аммо бунга ҳеч қачон йўл қўймаслиги»ни ёзди. Twitter бу хабарга «баҳсли контент ва одамларни чалғитиши мумкин» деган белгича қўйиб қўйди. Трампнинг Facebook’даги худди шундай хабарига эса овоз беришнинг якуний натижалари дастлабки натижалардан фарқ қилиши мумкин, деган белгича қўйилди.
Шундан сўнг Трамп Оқ уйда ўз тарафдорлари қаршисида нутқ сўзлади. У сайловлар натижаларини фавқулодда тенгсиз деб атади ва «бир тўда омадсизлар» ундан ғалабани тортиб олишга уринаётганини такрорлади. Трамп «иккиланувчи» штатларда ғолиб бўлаётганини таъкидлади.
2020 йилги сайловларда муддатидан олдин овоз бериш бўйича рекорд ўрнатилди. Америкалик сайловчиларнинг деярли ярми — тахминан 239 миллиондан 100 миллиони почта орқали овоз берди ёки участкаларга олдинроқ келди. Бу 2016 йилги президент сайловларида кузатилганидан икки марта кўп демакдир. Муддатидан олдин овоз бериш оммалашишини коронавирус эпидемияси билан боғлашмоқда: кўпчилик америкаликлар асосий сайлов куни участкаларда оломон тўпланишидан хавфсираган кўринади. Муддатидан олдин овоз берган америкаликларнинг кўпчилиги Демократлар партияси тарафдорлари деб тахмин қилинмоқда.
Сайловлардан олдин Трамп почта орқали овоз бериш амалиётини танқид қилган эди. У қалбакилаштиришга имкон яратиши ва ғолибни аниқлаш жараёни жуда чўзилиб кетишига олиб келиши мумкин, деган эди у.
Мавзуга доир: Фото: АҚШда президентлик сайлови қандай ўтди?
Изоҳ (0)