Ўзбекистонга кириб келган поезддан салкам 173 килограмм наркотик топилди

Давлат божхона қўмитаси Сурхондарё вилояти божхона бошқармаси Сариосиё темир йўл чегара-божхона пости ходимлари 2020 йил 3 ноябрь куни Давлат хавфсизлик хизмати ҳамда Чегара қўшинлари билан ҳамкорликда йирик миқдордаги гиёҳванд моддаларни республика ҳудудидан қонунга хилоф тарзда олиб ўтишга бўлган уринишни фош этишди, дея хабар бермоқда қўмита ахборот хизмати «Дарё»га.

Қайд этилишича, қўшни давлатдан кириб келган ва Ўзбекистондан транзит тарзида ўтаётган юк поезди инспекцион кўрик мажмуаси орқали божхона кўригидан ўтказилган. Текширув давомида божхона ходимлари вагонлардан бирида шубҳали сканер тасвирларини аниқлаган.

Мазкур вагон кинология ходимларининг хизмат итлари ёрдамида чуқурлаштирилган божхона назоратидан ўтказилганида вагоннинг остки қисмида махсус хуфиёна жойлар тайёрланганлиги аниқланган.

Ушбу хуфиёна жойлар белгиланган тартибда очиб кўрилганида уларнинг ичига қора рангли целлофан пакетларга скотчланган ҳолда 23 дона 5 литрлик сиғимга эга елим идишлар яширилгани фош бўлди.

Елим идишларнинг 4 тасига оқ рангли ўткир ҳидли 11 килограмм 987 грамм оғирликдаги героин, 2 килограмм 592 грамм гашиш ҳамда 19 дона елим идишларга жигарранг тусдаги ўткир ҳидли 81 килограмм 348 грамм ҳажмдаги гашиш мойи солингани аниқланган.

Шундан сўнг вилоят божхоначилари Давлат хавфсизлик хизмати, Чегара қўшинлари ҳамда ички ишлар ходимлари томонидан тезкор тадбир давом эттирилиб, Дарбанд темир йўл станциясида мазкур поезд таркибида бўлган яна бир вагон текширувдан ўтказилди.

Натижада ушбу вагоннинг остки қисмида ҳам темир листлар ёрдамида тайёрланган махсус хуфиёна жойда қора рангли целлофан пакетларга скотч билан ўралган жами 21 дона 5 литр ҳажмли полиэтилен идишлар яширилганлиги ва уларнинг ичида 30 килограмм 648 грамм гашиш гиёҳвандлик воситаси ҳамда 45 килограмм 906 грамм гашиш мойи гиёҳвандлик воситаси мавжудлиги аниқланган.

Ўтказилган тадбирлар давомида қарийб 172,5 килограмм оғирликдаги гиёҳванд воситаларнинг мамлакат ҳудудидан яширин равишда ўтказилишига чек қўйилди.

Ҳозирда мазкур ҳолат юзасидан божхона органлари томонидан жиноят иши қўзғатилиб, тегишли тергов органларига юборилган.