Ўзбекистон Президентининг тегишли фармонига мувофиқ Бекмуродов Адҳам Шарипович Президентининг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчисининг ўринбосари – Ўзбекистон Президенти ҳузуридаги Давлат бошқаруви академияси ректори лавозимига тайинланди. Бу ҳақда Давлат хизматини ривожлантириш агентлиги ахборот хизмати хабар қилди.
Адҳам Бекмуродов 1964 йил Бухоро вилояти Ғиждувон туманида туғилган. У 1985 йилда Тошкент халқ хўжалиги институтини, 1996 йилда Бельгиядаги Леувен университетини тамомлаган.
У фаолиятини 1985 йилда Бухоро вилояти Давлат қишлоқ хўжалик техника таъминоти бирлашмаси муҳандиси сифатида бошлаган. Сўнгги йилларда у Тошкент давлат иқтисодиёт университети ўқув ишлари бўйича проректори ҳамда Банк-молия академияси ўқув ва маънавият ишлари бўйича биринчи проректори лавозимида фаолият юритган.
Адҳам Бекмуродов 2018 йилдан то шу кунга қадар «Эл-юрт умиди» жамғармаси директори лавозимида ишлаб келаётган эди.
Аввалроқ Абдуҳаким Хожибоев Ўзбекистон соғлиқни сақлаш вазири, Алишер Шодмонов Тошкент тиббиёт академияси ректори ва Тошкент тиббиёт академияси собиқ ректори Президент маслаҳатчисининг биринчи ўринбосари лавозимига тайинлангани ҳақида хабар берилган эди.
Изоҳ (0)