Хусусий бандлик агентликлари томонидан уч мингдан ортиқ Ўзбекистон фуқаролари 2019–2020 йилларда Европа ва Осиёнинг 10 дан ортиқ давлатларига қонуний тарзда ишга жойлаштирилган. Бироқ айрим ХБАлар томонидан лицензия талаблари ва шартларини бузиш ҳолатлари учрамоқда. Бунинг натижасида 9 мингдан ортиқ фуқароларни алдаш йўли билан 80 миллиард сўмдан ортиқ маблағлар ноқонуний тарзда ўзлаштирилган.
Мазкур ҳолатларнинг олдини олиш юзасидан 2020 йил 13 августда «Хусусий бандлик агентликлари тўғрисида»ги қонунга ўзгартириш ва қўшимчалар киритилди. Ушбу қонун 2020 йилнинг 13 ноябридан кучга кирганидан сўнг вужудга келиши мумкин бўлган муаммоларнинг олдини олиш мақсадида 28 октябрь куни Бандлик ва меҳнат муносабатлари вазирлиги ва ХБАлари раҳбарлари иштирокида матбуот анжумани бўлиб ўтди.
«Бугунги кунда 103 та хусусий бандлик агентлиги реестр рўйхатидан ўтган бўлиб, шундан 75 та ХБАларга ваколатли орган томонидан белгиланган тартибда лицензия берилган ва 25 таси ушбу лицензия асосида фаолият юритмоқда. Ўтган вақт оралиғида юқоридаги нохуш ҳолатлардан келиб чиқиб, 2020 йил 13 августда «Хусусий бандлик агентликлари тўғрисида»ги қонунга ўзгартириш ва қўшимчалар киритилди ва 13 ноябрдан кучга киради», – деди бандлик ва меҳнат муносабатлари вазири ўринбосари Эркин Муҳиддинов.
Хусусан, ушбу қонуннинг қуйидаги бандларига ўзгартиришлар киритилмоқда:
- Ўзбекистон Республикасидан ташқаридаги иш қидираётган шахсларга ёзма шаклда билдиришнома берилиб, унда ишга жойлаштириш бўйича кўрсатилган хизматлар учун фуқаролардан ҳақ ундиришга йўл қўйилмаслиги тўғрисида;
- ХБАлар томонидан шартнома мажбуриятлари бажарилмаган ёки лозим даражада бажарилмаган тақдирда, мурожаат қилиш учун хусусий бандлик агентлигининг ҳамда Бандлик ва меҳнат муносабатлари вазирлигининг почта манзиллари ҳамда алоқа боғлаш учун телефон рақамлари кўрсатилиши;
- Ўзбекистон Республикасидан ташқаридаги иш қидираётган шахслар билан иш берувчилар ўртасида меҳнат шартномаларини тузишга кўмаклашиш;
- Ўзбекистон Республикасидан ташқаридаги иш қидираётган шахсларни ишга жойлаштириш бўйича хизматларга ҳақ тўлаш иш берувчининг маблағлари ҳисобидан амалга оширилади.
Изоҳ (0)