Ўзбекистонда 2020 йилги пахта мавсумида қанча мансабдор жазолангани маълум бўлди

Ўзбекистонда 2020 йилги пахта йиғим-терими мавсумида жойларда 2 570 дан ортиқ ташкилот, фермер хўжалиги ва кластерларда ўтказилган мониторинг натижасида меҳнат муносабатларига риоя қилиниши юзасидан 158 нафар мансабдор шахс маъмурий жавобгарликка тортилган. Бу ҳақда Бандлик ва меҳнат муносабатлари вазирлиги матбуот хизмати хабар берди.

Қайд этилишича, бунда 35 нафар мансабдор шахсга мажбурий меҳнатга жалб этиш ҳолати юзасидан 372 миллион 410 минг сўм миқдоридаги маъмурий жарима, банд бўлмаган аҳолини теримга жалб қилиш, теримчилар учун муносиб меҳнат ҳамда дам олиш шароитларини яратиш, терим пулларини ўз вақтида ва белгиланган меъёрларда бериш масалалари юзасидан 123 нафар мансабдор шахсларга 204 миллион 937 минг сўм миқдорида Маъмурий жавобгарлик тўғрисидаги кодекснинг 49-моддаси бўйича жавобгарликка тортилган.

Жумладан, Навоий вилоятининг Қизилтепа туманидаги «Оқробот юлдузи», Навбаҳор туманидаги «Хамра жума», «Асадбек Сарварбек», Хатирчи туманидаги «Ойдинов Одил Нодира», Хоразм вилоятининг Шовот туманидаги «Эргаш Рўзимов», Хонқа туманидаги «Матякубов Акмал», Хива туманидаги «Саид ота Мадаминов», Урганч туманидаги «Курамбоев Иноят», Янгибозор туманидаги «Ғаниев Рустам Рўзметович» фермер хўжаликлари раҳбарлари пахта терувчилар учун ётоқ жойларида ва овқатланиш бўйича зарур шароитларни яратиб бермаганлиги учун маъмурий жаримага тортилган ҳамда теримчилар учун муносиб меҳнат шароитлари яратиб берилган.

Ўтказилган мониторинг давомида 550 дан ортиқ фуқаро билан тегишли шартномалар расмийлаштирилмаганлиги аниқланиб, нафақат фермер хўжаликлари ва кластерлар раҳбарлари, балки фуқаролар билан ҳам тушунтириш ишлари олиб борилган ва тегишли шартномалар тузилган. 53 та ҳолатда айбдорларга нисбатан маъмурий жавобгарлик чоралари қўлланилган.

Шунингдек, жойлардаги 17 та фермер хўжалиги ва кластерларда терим пуллари ўз вақтида берилмаган 410 нафардан ортиқ фуқарога 173 миллион сўмдан ортиқ кунлик иш ҳақи тўлаб берилиши таъминланган. Бу каби ҳолатлар такрорланишининг олдини олиш мақсадида иш берувчилар билан тушунтириш ишлари олиб борилган.