Oktabr oyida iste’mol narxlari va tariflarining o‘rtacha darajasi bir oy ichida 1,4 foizga oshdi. Bu haqda O‘zbekiston Davlat statistika qo‘mitasi tomonidan taqdim etilgan ma’lumotlarda keltirilgan. Yanvar—oktabr oylari davomida iste’mol bozoridagi narxlar va tariflar o‘rtacha 7,8 foizga oshgan.
Oktabr oyida oziq-ovqat mahsulotlari o‘rtacha 2,3 foizga, nooziq-ovqat mahsulotlari — 0,8 foizga, xizmatlar 0,7 foizga qimmatlashgan.
Rasmiy statistikaga ko‘ra, oktabr oyida go‘sht, parranda go‘shti va baliq narxi sentabrga nisbatan 0,7 foizga ko‘tarilgan. Tuxum — 17,7 foiz, shakar — 8,6 foiz, meva-sabzavotlar esa 3,2 foiz qimmatlashgan.
Qayd etilishicha, shakar va go‘sht narxi yil boshidan beri 15 foizga oshgan. Xususan, suyaksiz mol go‘shti bahosi 10 oy ichida 18,2 foizga ko‘tarilgan.
Yanvar—oktabr oylarida paxta yog‘i 24,2 foizga (oktabrda – 13,6 foiz), kungaboqar yog‘i 23,9 foiz (oktabrda – 11,2 foiz) , sariyog‘ 11,1 foiz (oktabrda – 1,6 foiz), margarin 9,7 foizga (oktabrda – 1 foiz) qimmatlashgan.
Oy davomida aholiga ko‘rsatiladigan pullik xizmatlar tarifi 0,7 foizga ko‘tarilgan. Bunda yetakchilik yo‘lovchi transportlari xizmatiga tegishli bo‘lib, ularning narxi oy davomida 1,8 foizga qimmatlashgan, xususan, havo xizmatlari — 5,2 foizga, avtomobil — 1,4 foizga, temiryo‘l — 0,2 foizga qimmatlashgan.
Umumiy hisobda yanvar—oktabr oylari davomida tariflarning oshishi maktabgacha ta’lim tashkilotlari (15,2 foiz), dam olish xizmatlari (10 foiz), yo‘lovchi transporti (9,9 foiz) va maishiy xizmatlarga (9,7 foiz) tegishli.
Eslatib o‘tamiz, O‘zbekistonda yillik inflyatsiya darajasi sentabr oyida 11,7 foizni tashkil etgan edi.
Izoh (0)