Россия президенти Владимир Путин Давлат думасига Федерация Кенгашини шакллантириш тартиби тўғрисидаги қонун лойиҳасини тақдим этди. Ҳужжат Россия Конституциясига янги тузатишлар киритишни кўзда тутади, дея хабар бермоқда Meduza.
Қонун лойиҳасида президентлик лавозимини муддатидан олдин ёки ваколат муддати тугаши муносабати билан тарк этган Россиянинг собиқ президентларига сенатор лавозимини умрбод эгаллашга рухсат бериш таклиф этилади.
Ваколатини тугатган президент давлат раҳбари лавозимидан кетганидан кейин уч ой ичида сенатор бўлиш учун бир марта мурожаат қилиши мумкин. Муддати ушбу қонун қабул қилинганидан олдин тугаган собиқ президент қонун кучга кирган кундан бошлаб уч ой ичида мурожаат қилиши мумкин.
Шу билан бирга, Давлат думасига сенатор ва Давлат думаси депутати мақоми тўғрисидаги яна бир президентлик қонун лойиҳаси тақдим этилди. Ҳужжатда, бошқа нарсалар қатори, умрбод сенаторга айланган президент қонунда белгиланган ижтимоий ва бошқа кафолатлар, масалан, дахлсизлик ҳуқуқи ва умрбод ойлик олиш ҳуқуқига эга эканлиги белгиланган.
Аввалроқ Россия Конституциясига тузатишлар киритилган эди. Унга кўра, Путиннинг президентлик муддатлари ноллаштирилиб, унга навбатдаги сайловларда ҳам ўз номзодини қўйишга имкон берувчи банд киритилган.
Конституцияга тузатишлар киритиш бўйича умумхалқ референдуми 1 июль куни ўтказилди. Марказий сайлов комиссияси маълумотларига кўра, сайловда иштирок этганларнинг 77,92 фоизи тузатишларга розилик билдирган, 21,27 фоизи қарши чиққан. Овоз беришда давомат 67,97 фоизни ташкил қилган. Конституцияга тузатишлар киритиш тўғрисидаги фармонни Путин 3 июль куни имзолаган.
Изоҳ (0)